Shillong, K’Lyngkot 22
U MLA ka Jowai Constituency, u Bah Wailadmiki Shylla u la pynpaw ka jingsngewkmen ban ïoh pynlong ïa ka 6th Meghalaya Games ka ban long ha u snem ban wan ha West Jaiñtia Hills District.
Kane ka la wan hadien ba la pynbna da ka Sorkar Jylla hadien ba la pynkut noh ïa ka 5th Meghalaya Games ha ka sngi Saitjaiñ ha Tura, West Garo Hills.
U la pynpaw ka jingsngewhun mynsiem halor ka jingïalehkai bha ki khynnah ïalehkai ha ka 5th Meghalaya Games 2024 bad khamtam ïa ki khynnah ka West Jaiñtia Hills District kiba la lah ban khur ïa ka nam lahduh ha ka jingïalehkai Athletics.
U la ong ba ka jingpynlong ïa ka Meghalaya Games kan nang ai mynsiem shuh shuh ïa ki khynnah ba kin nang ïai trei shitom shuh shuh ha ki kam ïalehkai jong ki bad ha kajuh ka por kan long ka jingïarap ban pynbha shuh shuh ïa ki jaka ïalehkai ha kylleng ki district jong ka Jylla.
