Khliehriat, K’Lyngkot 22
Ban kyntiew bad aimynsiem ïa ki riew ïeid phutbol jong ka District, ka East Jaiñtia Hills District lyngba ka District Mineral Foundation (DMF) Fund, ka la tei ïa ki artylli ki madan Futsal ha Khliehriat East bad Khliehriat West.
Ïa kine artylli ki madan Futsal la plie paidbah ha ka Lah Sngi U Blei da u Myntri ka Sorkar Jylla, u Bah Kyrmen Shylla uba long ruh u MLA ka Khliehriat Con-stituency ha ka jingdonlang ka MLA jong ka Sutnga-Saipung Constituency ka Kong Santa Mary Shylla, u Deputy Commissioner ka East Jaiñtia Hills District, u A. Baranwal, u MDC ka Rymbai Khliehriat Fine-lyness Bareh, ki waheh Shnong bad kiwei kiwei.
U Bah Kyrmen ha ka jingkren, u la ïaroh ïa u DC, ki nongïalam Shnong, ki kontraktor bad ïa baroh kiba don bynta ban shna ïa ki madan bad u khmih lynti ba lyngba kine ki madan yn lah ban sei shibun ki riew donsap ha ka kam ïalehkai phutbol.
U Bah Shylla ula pyntip ruh ba ha ka wat ba nyng-kong (1st Phase) yn shna 5 tylli ki madan Futsal, 2 tylli dei kiba la dep shna ha Khliehriat West bad Khliehriat East. Nalor kata, ula pynbna ruh ba lyngba ka MLA skhim la mang Y.5 lak tyngka na ka bynta ban ker ïa ka madan bol ha Khliehriat West.
U Deputy Commis-sioner ka East Jaiñtia Hills District, u A. Baranwal ha ka jingkren u la kyntu ban ïatreilang ban pynbha ïa ki madan bad u khmih lynti ba ka jingdon jong kine ki madan ka District kan pynmih shi bun ki nongïa-lehkai don sap khamtam ki rangïalehkai phutbol ki ban lah ban wanrah jingkyrmen ïa ka district ha kiba bun ki jingïakop.
Ha kawei pat ka liang ka Kong Santa Mary Shylla ha ka jingkren ka la ong ba kan long ka sngi sah jingkynmaw ïa ki paid -bah ka thaiñ Khiehriat namar ka jinglah ban plie paidbah ïa ka Futsal Playground bad ka Village Parking Lot kiba dei ki jingtei kiba dawa bha ïa ki paidbah ka thaiñ Khliehriat East.
Ha kajuh ka por ka kyntu ïa ki paidbah ban sngewtrai ïa kine ki madan bad don ka jingkitkhlieh na ka bynta ka bha ka miat jong ka imlang sahlang.
