Guwahati, K’lyngkot:
U General Secretary jong ka seng Congress u Jairam Ramesh ha ka sngi U Blei u la pynshisha da kaba ong ba ka kali jong u ka la shah thombor ha ki nongbud jong ka seng BJP ha Jumugurihat ha ka por ba dang don ka Bharat Jodo Nyay Yatra.
U nongïalam jong ka seng Congress u la ong ba u la tehlakam ban pynbiang ïalade bad u la kiar ban tur sha ka kynhun jong ki runar, ha kaba kumba la pynshisha la ong ba kine ki dei ki kynhun ba pyrshah jong ka seng BJP bad ha kaba ïadei bad kane ka jingjia u la pynrem jur ïa u Myntri Rangbah jong ka jylla u Himanta Sarma.
“Ka kali jong nga ka la shah thombor khyndiat minit ha Jumugurihat, Sunitpur da ki riewshimkabu jong ka seng BJP ha kaba ki la tar ruh ïa ki shap ba la tah jong ka Bharat Jodo Nyay Yatra na ka ïit kali. Ki la kynshait um bad pyrta ruh ïa ki kyntien ban pyrshah ïa ka BJNY. Hynrei ngi la ïaleh ban tehlakam ïalade, kiar ban tur sha ka kynhun jong ki runar bad phet sted na katei ka jaka. Kane ka dei ka jingsngewsih kaba khraw halor ka jingleh jong u Myntri Rangbah ka Assam. Ngim shym don jingsheptieng bad ngin ïai bteng ïa ka kum kumba ngi thmu,” la ong u Jairam Ramesh ha ka jingthoh kaba u la buh ha ka rynsan phah khubor ha X.
Shuh shuh la pynshisha ba ha ka sngi Saitjaiñ ruh, ka seng Congress ka la pynshisha ba ka kynhun jong ka ‘Bharat Jodo Nyay Yatra’ ka la shah thombor ha ki runar jong ka seng Bharatiya Janata Party (BJP) ha Lakhimpur.
U President jong ka seng Congress u Mallikarjun Kharge u la ong ba ka seng kan sa leh ïa kaba donkam katkum ka aiñ pyrshah halor kine ki kam leh donbor jong ka seng BJP.
