Shillong, K’Lyngkot 22
U rangïalehkai shapdeng na Nepal u Arik Bista u la soi ïa ka kontrak bad ka Shillong Lajong FC na ka bynta ban ïoh ïalehkai ha ki jingïakhun ba dangsah jong ka lympung I-League.
Kat kum ki khubor kiba la mih ha Nepal la ong ba kane ka long ka sien kaba ar ba ka Lajong kan soi ïa ki rangïalehkai na Nepal hadien u Anil Gurung uba la wan ïalehkai sha India ha u 2009 na ka Lajong.
U Arik u dei u rangïalehkai bad uba la bat ruh kum u kapten na ka bynta ka Butwal Lumbini FC mynta ka aïom, bad kham hashwa u la mihkhmat ïa ka Lalitpur City FC ha ka Nepal Super League.
Hadien ba u la ïoh ban ïalehkai man ka por ïa ka kynhun ïalehkai jong ka ri Nepal ha ki kyrdan ïalehkai kiba dangrit, u Arik u la ïoh ban mihkhmat nyngkong eh ha ka jingïalehkai paralok pyrshah ïa ka Bangladesh kaba la long ha Dhaka ha u snem 2020.
Kane ka jingtbit ka la pynlong ïa u ban ïoh ïalehkai ruh na ki klob kum ka New Road ha ka A Division League bad hadien ia ka Church Boys United kaba la khur ïa ka nam lahduh ha ka A Division League.
Kumna ka long mynta ka Shillong Lajong ka la don ha ka kyrdan ban san na ki khadwei sien ïakhun ha kaba ka la jop san sien, ïakhaid saw sien bad shah rem ar sien.
