Jerusalem, K’lyngkot:
U Myntri Rangbahduh ka Israel- u Benjamin Netanyahu ha ka Sngi U Blei u la kyntait ia ka jingkyntu ban pyllait briew biang jong ki lehnoh Hamas namar ka jingleh jong ki (Hamas) ha ka 7 tarik u Risaw kaba katei ka kynhun lehnoh ka dang shu pyllait thymmai ia ki jingtip ba bniah shaphang ka jingdon jong kito kiba khlad ha katei ka por ka jingleit thombor jong kitei ki lehnoh ia ka Israel ha utei u snem ba la lah.
Namar la ong ba ki lehnoh Hamas ki la kyntu ia ka Israel ba kan sangeh noh shi syndon ia ka thma bad ki kular ban pyllait noh ia baroh kito kiba katei ka kynhun lehnoh ka la ioh rahbor naduh kaba sdang jong ka thma.
Hynrei utei u nong-ialam jong ka Israel u la pynpaw ia ka jingbym sngew ïahap bad ka bym lah ban pdiang namar ka jingleh jong ki Hamas ka long ka bym lah shuh ban map bad ha kajuh ruh ka por u Netanyahu u la ong ba lada sangeh noh ia ka thma, kan long ka jingailad ia kitei ki lehnoh ba kin ioh ban pynkhiah bad pynkhlaiñ ia ka kynhun jongki sa shisien pat bad kin nang ioh bor shuh shuh bad lada mynjur ia kane, ka jinglen lade bad jing iakhun shitom jong ki shipai Israel ka long kaba sep-ei bad ka bym don jingmyntoi. Kane ka pynpaw ia ka jingshah rem jong ka Israel naba kam lah ban iakhun pyndep ia ka thma pyrshah ia kitei ki lehnoh Hamas bad nalor kata kan long pynban ka jingma ia ki paidbah nongshong shnong jong ka Israel hadien- habud lada pyllait im ia katei ka kynhun lehnoh ha kane ka sien.
Kumta, u Netanyahu u la pynshai ba ka Israel kan nym sangeh da lei-lei ruh ia ka thma bad kan nym ailad shuh ia kitei ki lehnoh ba kin dang khyllie khlieh biang hadien- habud namar kan long ka jingma ym tang ia ka Israel hynrei wat ia kiwei- kiwei ruh ki ri kiba don marjan bad ka Gaza bad kumjuh ruh bad ka Palestine.
