U nongïalam ka seng Congress, u Rahul Gandhi, ha ka 22 tarik Kyllalyngkot, u la wan poi sha Ri-Bhoi District kum shi bynta na ka jingïaid lynti ka jong u ïa kaba la tip kyrteng kum ka ‘Bharat Jodo Nyay Yatra’. Kane ka jingïaid lynti ka la sdang naduh ka 14 tarik Kyllalyngkot na Manipur bad ka la dep wan ruh sha Nagaland bad Assam. Ngi long kiba donbok ba ki paidbah jong ngi ki long kiba don akor namar ka khlem mih satia kano-kano ka jingïakawang ktieh ha surok. Kiba la mih ban kyrshan, ki la mih bad kam shym la don kano-kano ka jingjia ba sngewsih ne ka ban pynthohbria ïa ka jylla watla ki paidbah ki dei na ki seng saiñpyrthei bapher-bapher. Ha Assam, ngi la ïohi ba ka la long da kumwei bad kam itynnad satia ban long ha kato ka dur bad ka la shu sah dak sniew ei. Kam myntoi ban ïaleh biej ha surok da kaba pynwit bad thaw jingkulmar ïa kiwei namar kan sa kyrtoh kylla hadien habud.
Watla u Rahul bad ka Congress ki la kam ba kane ka jingïaid lynti kam don jingïadei bad ka ilekshon Lok Sabha ka ban sa long hadien katto katne bnai, hynrei ngi sngewthuh ba ka dei ruh ka lad ïa ka Congress ba kan pynkhie im biang ïalade. La jan don 10 snem ba ka BJP ka la knieh ïa ka bor synshar na ka Congress hadien ka jingwan jong u Narendra Modi kum u Myntri Rangbahduh ka Ri. Ha kine ki 10 snem, ka Congress ka la troiñ ha kiba bun ki jaka watla ka dang lah ban neh ha ki katto katne ki bynta jong ka Ri. Ha ki jaka ba ka Congress ka la don ha ka bor ha ri thor, ka BJP ka la lah ban jop biang ïa kito ki jylla kum ka Rajasthan bad Chhattisgarh watla ka la lah ban pynliem ïa ka BJP ha Karnataka. Ha ki jylla kiba heh kiba don ha ki bynta ba Shathie jong ka Ri, ka BJP kam don ha ka bor synshar wat tang ha kawei ruh hadien ba ka la shah knieh ïa ka bor synshar ha Karnakata ha ki khyndiat bnai ba la lah.
Kaba lyngngoh eh ka dei ka thaiñ Shatei Lam Mihngi bad ha ki hynñiew tylli ki jylla ha kaba ka Congress kam don shuh ha ka bor wat tang ha kawei ka jylla ruh. Mynshwa, ka BJP kam ju lah ban thaw pyrthei ha kane ka thaiñ, hynrei mynta ka dur ka dar ka la long da kumwei. Wat ka Congress ruh ka shaïong ngaiñ halor kane ka jingtroiñ ha ka thaiñ. Ngi ïohi ïa kane ba ka wan jia ruh ha ka jylla Meghalaya kaba la ju synshar da ka Congress da ki phew snem – la ka dei ba ka synshar marwei ne ka ïalam ïa ki sorkar synrop. Ym tang ba ka duh ïa ka bor synshar, ka la duh ruh ïa ki nongïalam kiba tbit kum u Himanta Biswa Sarma, Dr Mukul Sangma bad kiwei kiba la pynïasoh ïalade sha kiwei pat ki seng saiñpyrthei. Ka jingmih noh jong kine ki nongïalam ka la nang pynhiar arsut ïa ka Congress.
Ngi sngewthuh ba ka Congress ka angnud dik-dik ba kan wanphai biang sha ka bor synshar namar lada ka shah rem sa mynta ha ka BJP, ngim tip shuh kaei ka ban jia ïa kane ka seng ha ki sngi ki ban wan. Ngi ïohi ba u Rahul u pyrshang katlah katïai ban ïakhun bad ka BJP tangba ngim ïohi ba un kot bor kumba kot u Modi ha ka jinglah ban khring paidbah bad ban pynlong ïa ki paidbah ba kin jied hapdeng ka Congress bad ka BJP. Ka Congress ka ïalam ïa ka kynhun ‘INDIA’ kaba dei ka kynhun synrop jong kumba 26 tylli ki seng kiba pyrshah ïa ka BJP. Kine ki seng ki dang don hapdeng ka jingïakren ban ïapynbeit mano ban ïakhun na kano ka konstitwensi ha ka ilekshon Lok Sabha. Lada ki don bun ki jingïaknieh, ka jingïohnong kan long ïa ka BJP. Ngin sa nang ïa peit kai katno kin lah ban ïapynbeit bad pynduna ïa ka jingïaknieh.
Ka synshar paidbah kan khlaiñ lada ka don ka sorkar kaba skhem bad ka liang pyrshah kaba donbor. Ngin ym lah ban shan slem kum ka ri synshar paidbah. Lada ki nongshong shnong ki shah lehbeiñ ha ka sorkar, ka dei ka kamram jong ka liang pyrshah ban ïada bad ban long ka sur na ka bynta jong ki. Hynrei lada ngi ïoh da ka liang pyrshah kaba tlot, ki paidbah ruh kin rit mynsiem bad kin ym nud ban saham pyrshah ïa ka sorkar. Ka por kan sa batai shaei ngin ïa phai kum ka Ri bad ki nongshong shnong.
