Chennai, K’lyngkot:
Ki nongrep jong ka Thoothukudi kiba la shah kular ba ki jingthung jingtep jong ki la shah kynthup hapoh ka jingtreikam jong ka Pradhan Mantri Fasal Bima Yojana (PMFBY), kaba long ka skhim ai jingkyrshan jong ka sorkar, ki la ïohpdiang ïa ka jingïarap pisa na ka bynta ki jingthung jong ki kiba la shah ktah na ki jingshlei um kiba dang jia shen.
Ha kaba ïadei bad ka jingkhmih bniah halor ki jingjulor jong ki jingthung ba la eh da ki heh jong ka Horticulture Department, ka IFFCO-Tokio General Insurance Company, ki heh ba dei khmih na ka bynta ka Thoothukudi distrik, ki la pyllait ïa ka pisa kaba T. 5.39 lak sha ki 12 ngut ki nongrep kait, T. 90.18 lak sha ki 700 ngut ki nongrep dhania, T. 5.27 klur sha ki 3,760 ngut ki nongrep piat bad T. 8.32 klur sha ki 5,456 ngut ki nongrep sohmynken, ha kaba ki jingthung jong ki ki la shah pynjulor na ka jingwan hap jong u slap uba jur ha u bnai Nohprah jong u snem 2023.
Kumjuh, ka Insurance Company ruh ka la pyllait ka jingai jingkyrshan pisa halor ka jingjulor jong ki jingthung hapdeng u snem 2022-23, kaba kynthup ïa T. 4.13 klur na ka bynta ki 8,092 ngut ki nongrep kynphad, T. 4.29 klur na ka bynta ki 3147 ngut ki nongrep riewhadem, T. 22.22 lak na ka bynta ki 1237 ngut ki nongrep piat bad T. 7.34 klur na ka bynta ki 6632 ngut ki nongrep sohmynken.
