Beijing, K’lyngkot:
Ki kynhun iarap jong ka China ha ka Sngi Ba-ar ki la ioh sei ia 12 tylli ki metiap na ki bynta lum jong ka Southwest katei ka ri hadien ka jingtwa khyndew kaba jur ha katei ka thaiñ.
Katei ka jingtwa khyndew ka la jia ha ka step Sngi Nyngkong bad ka la tap ia kumba 18 tylli ki iing briew bad kumta ki bor pyniaid ka Zhenxiong County ki la pynkynriah noh ia kumba 200 ngut ki nongshong shnong jong katei ka bynta khnang ba pyllait ia ki shipor na ki jingma kiba lah ban wan.
Ha ka Sngi Ba-ar hadien kumba 24 kynta jong katei ka twa khyndew, ki lad pathai khubor na Xinhua ki la iathuh ba ki kynhun iarap ki dang ialeh ban wad shitom ia kitei kiba jah rngai bad kiba shah tap baroh ioh lehse kin don kiba dang im bad kiba sahkut ha ki kyndong-kynshrot lane ha ki jaka kiba dang lah ban pyllait im ia ki.
Namar la ong ba watla ki briew jong ka kynhun iarap ki la ialeh shitom bad miet bad sngi ban wad bad khyllie ia ki kynrum- kynram kiba tap ha kitei ki jaka ba sah briew.
Kumta, la ong ba ki bor pyniaid ki la phah palat 200 ngut ki briew na ka tnat iarap ban leit sha katei ka thaiñ bad ban pynkhuid bad sei ruh ia kitei kiba ngat bad khlad ha katei ka jingjia.
La ong ba katei ka thaiñ ka dei kaba khriat bha bad la sop lut da u thah bad ka ïor bad kumta ki kynhun iarap ki hap ban pynkhuid bad ban tih shwa ia kitei ki thah kiba la sop ia baroh ki bynta jong katei ki jaka kiba twa.
Katkum ki dur bad video ba la ioh ring bad pynsaphriang da ki paidbah na katei ka jaka, la iohi ia ki kynhun iarap kiba dang ialeh ban tih bad sei ia kitei kiba ngat ha katei ka jingtwa bad ha kajuh ruh ka por la iohi ia ki paidbah kiba la shu shong shabar ki madan- madiah bad kiba ialum shi jaka ban syaid ding namar ka jingkhriat tasam jong ka aïom tlang.
