U Nongsaiñ Hima, 1969
Ban pynpaw ba ka kam ne ka jingkren ka long kaba khlem nongrim,ma ngi ki Khasi ngi ju ong ba u nongkren u shu kren ha suin ne ka kam kaba tang ha suin. Ha suiñ te ka long kumta hi bad yn ym lah ban tei ïa ka nongri ha suin
La teng teng ka paw ba u briew u la jop ïa ka suiñ wat ïa ka haw har, hynrei dang don hi kaei re kaei kaba pynpaw ba ka suiñ te ka dei hi ka suiñ. Don ki jingjia hangne hangtai kiba ïai pynkynmaw ïa u khun bynriew bay m dei ma u, U Lah – duh ne U Stad Duh hynrei don ka Bor kaba sha lyndet ka jingsngewthuh jong u kaba ïai pynkynmaw ba u khun bynriew u m long ei ei namar u long tang u jynthaw bad ba la phah ïa u sha pyrthei ban pyndep ïa la ka kamram kumba la thmu la buh da U Nongbuh U Nongthaw. Kane ka dei ban pynkynmaw bad pynpyrkhat ïa u khun bynriew ba u dei ban pyndem ban pynrit ïalade ha kata ka Bor.La hateng hateng u khun bynriew u klet ïa kita ki jingshisha. Na ki kam, ki ktien ne na ka ïaid ka ïeng, u khun bynriew u sngew la kat u Lah – duh khlem khein snep ba kita ki kam ki jam ne ki ktien ki thylliej ki long kiba khlem nongrim bad tang ha suiñ. Kumta ka long kaba dei eh ba u khun bynriew un tip bha ïalade ha kano ka kyrdan u don, u dei ban kynmaw ba u dei tang u Jynthaw jong kata ka Bor sha lyndet ka bor pyrkhat jong u.
Peit sha ki Ri jong ka pyrthei, imat ba ma ki hi ruh ki shong syier bad ba ka jingim jong kita ki Ri ki long tang ha suiñ bad khlem nongrim. Ki la shaniah tang ha la ka Bor ba ki lah ban pynjot bad ha kane ka liang la don ka jingïamareh thong hapdeng ki Ri ka pyrthei ba mano ban poi sha khmat ha ka jinglap bad jingpynbha ïa ki bor pynjot. Kumta ki Ri ka pyrthei ki im ha tmier ka riat bad khlem nongrim, ha kano kano ka por ki lah ban hap sha ki niamra jong ka jingduh jingjot kaba ym lah ban batai.
Ha ka jingim shimet ne shi ïing shi sem iba ka jingpyrkhat ka long – BAM, DIH BAD LEH SNGEW-BHA NAMAR BA LA SHAI NGI LA ïAP NOH. Kum kata ka jingpyrkhat lah ban ong ba ka long kaba ym don nongrim ei ei bad ka ban ïalam sha ka jingjot.
Lada peit sha ki thaiñ Mihngi jong ngi ruh, ym i don tynrai satia. Kumno yn lah ban pyrkhat ba ka jaidbynriew kaba tang SAW LAK ngut yn don 4 tylli ki sorkar. Sngewlah ma ban pyrkhat kum ïa kata kaei kaei ! Kane hi ka kam bad bun kiwei kiwei ki pynpaw ba la shu leh khlem da pynpyrkhat bad khlem nongrim.
Ym lah ban sngewthuh ba kumno ha ka nongrim khlem dewtynrai yn tei ïa ki mala kiba bun bad ban ai ka nia ba nangne yn sa pynlong u mawjam sha khmat na kata ka dew kynroi ?Hato kane ka long ka kam Rangbah ne ka kam kaba shu leh ha suiñ tang ban shu dep rukom ban myntroi ïa lade shimet.
