Imphal, K’lyngkot:
Naba ki kynrum kynram bad ki jingïakynad ha Manipur ki la nang ïai bteng, u Myntri Rangbah jong ka Mizoram u Lalduhoma ha kine ki khyndiat sngi u la ong ba u la khmih lynti ba kan sa don da ka jingsynshar President ne ka President’s Rule ha ka jylla.
Ha ka jingïakren bad ki nongthoh khubor hadien ka prokram jong ka 71st Plenary Session jong ka North East Council (NEC) ha Shillong, u la ong: “Ki jinglong jingman ha Manipur kim pat biang. Ka la dei ban don ka jingkhmih bniah jong ka sorkar India, ka sorkar Manipur bad ki nongïalam jong ki riewlum.”
Haba la buh jingkylli halor ka jingkyrpad ban pyntreikam noh da ka jingsynshar President ha Manipur, u Lalduhoma u la ong: “Kata ka dei kaba nga la khmih lynti namar ba ka la neh slem bha. Ki jinglong jingman kim shym kylla bad hateng hateng ka la nang shah ktah jur na ka jingdon ki kynrum kynram.”
“Ka sorkar kmie ka la dei ban shim ki jingtuklar ba kyrkieh ha kaba ïadei bad ki jinglong jingman ha Manipur. Ka dei ka jingkitkhlieh jong ka tnat ki kam pohïing ban weng ïa kine ki jingeh. Ngam don bynta ei ei ban leh ha kaba ïadei bad ka Manipur lait noh ban peit bad khmih bniah halor ki poiwir kiba poi ban sah shipor ha Mizoram.”
U la ong ba kito ki briew na Manipur hadien ki kam thombor kiba la poiwir ha Mizoram ki dei ki nong India.
“Ka Riti synshar jong ka ri, ka la ong ba kine ki briew ki lah ban sah ha kino kino ki jaka hapoh ka ri. Katba ka jingsuk kam pat phai sha ka jylla Manipur, ngin sa khmih bniah na ka bynta jong ki.”
Ki la don palat 13,000 ngut ki riewlum kiba dei jong ka kynhun Kuki-Zo na Manipur kiba la sah ha Mizoram namar ka jingjia jong ka jingïakynad.
U Lalduhoma u la ong ruh ba ki briew kiba la phet na Myanmar sha ka jylla jong u na ka bynta ban buhai shnong ki la ïoh ïa ki jaka sah bad ki lad jingïarap.
“Ki shipai jong ka Myanmar ki la nang leit sah kum ki poiwir, ngi la phah pynphai biang ïa ki lyngba ki liengsuiñ. Ki la don kumba 450 ngut ki shipai kiba la shah pynphai biang sha ka ri jong ki. “
U Lalduhoma, ha ka jingleit jurip jong u ïa ka Delhi hadien ba u la shimti ïa ka kam, u la ïakynduh ïa u Myntri Rangbahduh u Narendra Modi, ïa u Myntri ka tnat ki kam pohïing u Amit Shah, bad u Myntri korbar ri u S Jaishankar na ka bynta ban pynshai sha ki halor ki jingeh jong ki Mizo bad ban ïakren ruh halor ki mat ba ïadei bad ki poiwir kiba dei ki nong Myanmar, khamtam ha kaba ïadei bad ka jingdon jong ka jingkyrpad jong ka sorkar India ban ker ïa ka khappud bad ka Myanmar.
