Imphal, K’lyngkot:
Ka Coordination Committee (CorCom), ka kynhun jong ki 6 tylli ki kynhun kieng atiar ki la ai da ka rai ban khot pakhang da kumba 18 kynta ha ka jylla Manipur bad ban pep ha ka ban rakhe ïa ka Republic Day, kaba dei ban long ha ka 26 tarik, Kyllalyngkot.
Ha ka jingthoh ba la phah, ka jingkhot pakhang kan sa sdang naduh ka por shiteng miet jong ka 25 tarik, Kyllalyngkot haduh ka por 6 baje janmiet ha ka 26 tarik, Kyllalyngkot.
Ha kaba ïadei bad kane ka jingkhot pakhang, la pynbna ba la pyllait na ka jingpyrkhing ha kaba ïadei bad kito kiba trei na ka bynta ki riewpaidbah, kynthup ki lad phah khubor, ki kam niam, ki jingleit phah sumar, ka jingpynpoi um bad ki kam ba ïadei bad ki pulit pyllip ding.
Katba ka India kan rakhe lehkmen ha ka 26 tarik, Kyllalyngkot ïa ka Republic Day, na ka bynta ki briew jong ka Manipur, kan kham bha ban tip ba kan dei kum ka ‘Repressive Day,’ la ong ka jingthoh.
Ka kynhun CorCom ka la ong ba kam don jingmut ba ka jylla kan rakhe ïa ka Republic Day namar ka la ïohmad ïa ki jingïaumsnam da palat 8 bnai ha ka jylla.
Ha ka jaka kane la dei ba rakhe da ka “Black Day” da ki paidbah ha kaba ki la hap ban kyntiew da ki lama ïong haman ki ïing jong ki ha kane ka thaiñ, ka la bynrap. Kum shi bynta ban pynrem jur ïa ka sorkar kmie halor kine baroh kiba la jia, ka jingthoh ka la ong ba ki kam pyntriem ha ka jylla ki la ïai bteng bad ki la ktah jur ïa ka Manipur.
