Imphal, K’lyngkot:
Ki pulit jong ka Manipur ki la kyntait halor ka jingpynshisha da ka seng Kuki ba ki shipai ïada ri ki la ïatreilang bad ka kynhun kieng atiar ha Moreh ha ki jingïakynad dang shen.
Ka Moreh ka dei kawei na ki jaka sorkar kaba don ha khappud jong ka Myanmar bad kumba la pynshisha da ka sorkar jylla la ong ba ki runar na ka ri ba marjan ki la wanrah jingeh ha ka jylla.
“Ka jingpynshisha jong ka Committee on Tribal Unity (COTU) bad ka Kuki Inpi Manipur ha kaba ïadei bad kane ka jingïatreilang jong ki shipai bad ka kynhun jong ki riewkieng atiar bad ki lehnoh Meitei kumba la pynshisha da ki shipai ha Moreh la ong ba kam dei kaba shisha. Kine ki jingkynnoh baroh ki dei ki bym don nongrim bad kiba la ïalam bakla,” la ong ka jingthoh ba la wan na ki pulit.
Ki la don arngut ki pulit Commando kiba la shah pynïap ha ka 17 tarik, Kyllalyngkot ha ki kam thombor jong ki lehnoh ha Moreh, katba kiba bun kiwei pat ki la mynsaw.
Ki seng jong ka kynhun Kuki ki la pynshisha ba ki lehnoh kiba la leit pyndem ki la don bynta ban ïatreilang bad ki pulit jong ka jylla.
Ka jylla Manipur ka la khihwin na ka jingjia jong ki kam thombor kaba la long naduh u bnai Jymmang jong u snem ba la lah bad ki la don palat 180 ngut ki briew kiba la shah pynïap.
Kane ka jingïakynad kaba jur ka la jia ha ka 3 tarik, Jymmang, hadien ba ka la don ka ‘Tribal Solidarity March’ ba la pynlong ha ki distrik kiba don ha ri lum ban pyrshah jur ïa ka jingdawa jong ka kynhun jaitbynriew Meitei na ka bynta ban kynthup ha ka Scheduled Tribe (ST) bad nangne ki la mih ki jingïakynad bad ki jingïaum snam.
