Shillong, K’Lyngkot 23
Ka long ka sngi ka ban sah jingkynmaw ïa ka shnong Wahïajer, West Jaiñtia Hills District ha kaba la ïoh ban plie ïa ka jaka ïalehkai kaba paka ha ka jinglut kumba T. 64 klur kaba la tip kum ka Wahïajer Multi Sports Complex.
Ïa kane ka complex la plie da u Myntri Rangbah ka Jylla u Conrad K Sangma ha ryngkat ka jingïadon lang ki Symbud Myntri Rangbah u Bah Prestone Tynsong bad u Bah Sniawbhalang Dhar, kumjuh u Myntri ka tnat Sports & Youth Affairs u Bah Shakliar Warjri, ka Myntri ka tnat ka rep ka riang ka Kong Ampareen Lyngdoh, u Myntri ka tnat Cooperation u Bah Comingone Ymbon, u Chief Executive Member ka Jaiñtia Hills Autonomous District Council (JHADC) u Bah Thom-bor Shiwat bad kiwei kiwei.
Ïa kane ka complex la phiah haduh lai bynta ha ka jinglut kaba T. 64.40 klur na ka bynta ban kyntiew ïa ki samla ïalehkai jong kane ka thaiñ. Ka jingpynlut na ka bynta ka wat kaba nyngkong (Phase-I) ka long T. 24.97 klur, ba-ar ka long T. 14.82 klur bad T. 24.61 klur na ka bynta ka wat kaba lai ban pynbiang ïa baroh ki jingdonkam ha kane ka jaka.
Haba ai jingkren ha kane ka sngi, u Conrad u la ong, “Ka long ka sngi sah jingkynmaw ïa ngi ban sakhi ïa ka jingplie ïa ka Wahïajer Multi Sports Complex. Kane ka ai jinghun ïa ki namar ka dei ka jingangnud bad ka jingïohi jngai u Symbud Myntri Rangbah u Bah Sniawbhalang Dhar bad kane ka la wan urlong shisha. Ban pynurlong ïa kane ka sngi, bun na ki paidbah ki la trei shitom bad nga ai khublei na ka bynta jong ki.”
“Ka jingplie ïa kane ka Stadium ka pyni ïa ka jingtrei shitom ka Sorkar Jylla na ka bynta ka jingmyntoi ki khun samla jong ka Jylla. Ha kine ki san snem na ka liang ka tnat ïalehkai ka la pynlut ha ka ban wanrah ïa ki jingtei ïa ki jaka ïalehkai bad kane ka long palat na kaba la leh ha ki 45 tylli ki snem kiba la leit,” u la bynrap.
“Kumba ka 6th Meghalaya Games kan long ha West Jaiñtia Hills bad kane ka long ka kabu kaba biang ba kane ka lympung kan wan urlong,” u la bynrap.
U la bynrap ruh da kaba ong ba ka Sorkar ka la shim khia ha ki kam ïalehkai kum ka STAR Program, ka jingai jing-ïarap ia ki nongïalehkai bad ka jingwanrah ïa ki riew shemphang kiba nabar na ka bynta ban kyntiew ïa ki nongïalehkai ha kylleng ka Jylla.
Ha kane ka Wahïajer Multi Sports Complex ki kynthup ïa ka madan ïalehkai phutbol (standard artificial football turf), kumjuh ka synthetic athletic track kaba 400m lem bad kiwei ki jait jingïalehkai kiba lah ban pynrung hapoh kane ka complex.
Ha kawei pat ka liang u Bah Sniawbhalang u la ong, “Nga ai khublei ïa u Myntri Rangbah halor ka jinglah ban pynïoh ia kane ka projek ka ban pynsah kynmaw ïa kaba ki samla kane ka thaiñ ki la ïai angnud baroh shi katta.”
Kumjuh na ka liang u Bah Shakliar u la ong, “Nga sngewkmen ban ïadon bynta lang ha kane ka jingplie ïa kane ka stadium bad ruh ban ïohi ïa kum kane ka stadium ha Jaiñtia Hills. Ngi don ka jingïohi jngai ban kyntiew ïa ki jaka ha ka Jylla hi baroh kawei.”
“Hapoh ki san snem ki ban wan, ngi kwah ban pynlong ïa ka Jylla jong ngi kaba nyngkong ha ka liang ki kam ïalehkai hapoh ka thaiñ shatei lammihngi,” u la bynrap.
