Jerusalem, K’lyngkot:
Ka tnat shipai Israel ha ka Sngi Nyngkong ka la pyntip ba ki don palat 200 ngut ki shipai ka Israel kiba la kyllon iap hapdeng ka jingiakhun naduh u Risaw 2023 pyrshah ia ki lehnoh Hamas kiba synshar da lade ia ka nongbah Gaza jong ka Palestine.
Kumta la ong ba katkum katei ka kaiphod ba la ioh lum jingkheiñ thymmai ha kane ka kynti, la shem ba ki don palat 200 ngut ki shipai ka Israel kiba la kyllon iap noh hapdeng ka jingiakhun thma jongki pyrshah ia ki lehnoh Hamas naduh kaba sdang jong ka thma haduh kane ka kynti.
Haba iadei bad kane pat, la ong ba haduh 24 ngut ki shipai ka Israel ki la kyllon iap ha ka jingiakhun thma bad ki lehnoh Hamas hapoh Gaza. Ia kane la pyntip da ka tnat shipai Israel ha ka Sngi Ba-ar bad ka long ka jingkheiñ kaba bun tam lada peit ia ka jingïap ki shipai Israel ha ka jingiakhun thma bad ki Hamas man la ka sngi.
U nongrah ktien ka tnat shipai Israel u la iathuh ba kitei kiba khlad ki kynthup ia kito kiba ngat ha ka jingbthei u bom ba la ther da ki lehnoh sha ka phang ba don ki kynhun shipai ka Israel.
Ha katei ka jingjia, la ong ba ki lehnoh ki la ther bad kawang da ki bom Grenade sha kawei ka tup ba don ki shipai Israel bad ha kajuh ka por ruh kawei ka ïingmala ba la riam bom da ki shipai ka Israel ka la bthei lang bad katei ka ïingmala ka la khyllem bad tap ia kitei hi ki shipai kiba don ha katei ka jaka.
Watla katta, ki dang phah wad jingtip halor ka daw jong katei ka jingbthei ba kynsan jong katei ka ïingmala watla kam shym don kano- kano ka jingktah ne jing pynthud ia katei ka jaka ha katei ka por.
Kane ka jingïap ki shipai Israel ka long ruh hadien ba ka Israel ka la phah ia ki shipai jongka ban leit hiar thma sha ki bynta West jong ka Khan Younis hapoh Gaza bad hadien ba ka Israel ka la pynjur ia ka jingleit hiar thma sha katei ka thaiñ.
