Chandigarh, K’lyngkot:
Ka sorkar Punjab ka la rai ban plie shuh shuh sa 30 tylli ki Aam Aadmi Clinics, ka skhim ai jingïarap na ka bynta ban pynïoh ïa ka koit ka khiah jong ka sorkar AAP hapoh ka jingïalam jong u Bhagwant Mann ha ki distrik kiba don ha khappud jong ka Haryana.
Katkum ka hukum ba la phah da ki heh ba dei khmih, kine ki jaka ai dawai bathymmai kin sa plie ha ki 6 tylli ki distrik, kynthup ha Patiala, Bathinda, Mansa, Muktsar, Sangrur bad Mohali.
Ki District Health Society jong ki 6 tylli ki distrik, ba la khlieh da ki Deputy Commissioner, ki la hukum na ka bynta ban pyntikna ha ka ban pynbiang ïa ka leit ka wan lyngba ki jingpynbha ïa ki surok sha kine ki 30 tylli ki jaka ai dawai ha ka 20 tarik, Rymphang, khnang ba kine ki jaka kin treikam naduh ka 28 tarik, Rymphang, la ong ki heh ba dei khmih.
Ka sorkar Punjab haduh mynta ka la dep ban aiti ïa 664 tylli ki Aam Aadmi Clinic sha ki briew ha kaba 84 tylli ki dei ki jaka ai dawai bad 40 tam ki dei kiba don lang bad ki jaka ai jingsumar ha kaba ki briew ki lait ei khlem donkam siew lada ki phah sumar.
“Ka jingnang pynbha ha kaba ïadei bad ki ïing ba la buh ïa ki, kynthup ki jingbuh jingsat ba la pyndonkam hapoh jong ki, na ka bynta kine ki jaka ai dawai kiba thymmai kin ym duna ïa ka jinglut kaba palat ïa ka T. 25 lak kawei bad ki jingbuh ïa ki jingdonkam ha kaba ïadei bad kine ki jaka sumar kan ym tam ïa ka T. 40 lak kawei,” la ong ka jingthoh ba la phah da ka tnat ka koit ka khiah jong ka Punjab.
Ha Patiala distrik, ki la don kumba 6 tylli kine ki jaka ai dawai ïa kiba la dep ban plie, ar tylli ki dei ha Punjab bad khappud Haryana.
“Ka long ka sienjam kaba bha ban nang pynmih shuh shuh kine ki jaka ai dawai, hynrei ka sorkar ka la dei ban nang pynbun shuh shuh ïa ki nongsumar bad ba kin treikam ruh baroh 24 kynta ha ki Primary Health Centre ba bun,” la ong uwei na ki nongsumar u bym shym kwah ban pynpaw kyrteng.
