Khyber Pakhtunkhwa, K’lyngkot:
U nongialam ba hakhlieh jong ka Pakistan Muslim League-Nawaz (PML-N)- u Nawaz Sharif ha ka Sngi Balang u la ong ba kam long kaba suk ia ka sorkar mynta ba kan pynkhie im biang ia ka Pakistan kumba ka long ha ki por ba la leit.
Kane ka jingkren jong utei u nongialam ka Pakistan ka long hashwa ba ka Pakistan kan ioh ban pynlong noh ia ka ilekshon bad u la kren ruh ha ka por ba u ai jingkren sha ki paidbah ha ka jing-ialang paidbah na ka bynta ka ilekshon ka ban long ha une u bnai u ban wan ha katei ka ri kaba don ia kumba 240 Million ngut ki paid nongshong shnong.
Haba ai jingkren ha ka jingialang paidbah kaba la pynlong hapoh Mansehra ka thaiñ kaba utei u nongialam un iakhun bad mih khmat, u Sharif u la ong ba ka sorkar barim hapoh ka jingialam jong u, ym tang ba ka la ialeh ban pynkiew ia ka pisa jong ka ri hynrei ka sorkar jong u ka la lah ruh ban rat dyngkhong ia ka jinglip bor ding ba khah-khah hapoh ka ri.
Ha kajuh ka por, u Sharif u la ther pyrshah ruh ia ka seng Pakistan Tehreek-e-Insaf (PTI) jong u Myntri Rangbahduh barim ka Pakistan- u Imran Khan, ha kaba u la ong ba ki paidbah ki la shu ngop bad hap ha ki jingkular ba khlem nongrim bad ka jingthoh jingshukor jong katei ka seng ka bym lah da lei-lei ruh ban leh kumba la kular ia ki paidbah ha ki por ilekshon.
Haba iadei bad ka ilekshon 2013, u Nawas Sharif u la iathuh ba u nongialam ka seng Jamiat Ulema-e-Islam (JUI-F) – u Maulana Fazlur Rehman u la wan sha u ban kyntu ban iatrei lang bad ban thaw sorkar iatrei lang ha KP, hynrei u Sharif ha katei ka por da kaba burom u la ailad ia ka PTI kumba ka dei hok ban ioh thaw sorkar namar ka jinglah jongka ban khur bun tylli ki shuki Myntri ha ka ilekshon ha utei u snem.
Hynrei, ha kane ka por, u Sharif u la buh jingkylli ia ki paidbah ba aiu katei ka seng PTI ka la leh hapdeng kitei ki 10 snem kiba katei ka seng ka la synshar hapoh ka ri Pakistan.
Namar kata, u Sharif u la khlei pat ia ki kular ba thymmai ba lada ki paidbah kin ailad ia ka seng jong u ban synshar hapoh ka ri ha une u snem, ka sorkar jong u kan pyntikna ia ka jingbhah kam na ka bynta ki paidbah nongshong shnong jong ka ri bad ha kajuh ka por ruh kan pynïoh Kad Liengsuiñ ia ka Mansehra ha ryngkat ki skul pule bad ki skulbah bapher ba ka sorkar jong u kan wanrah ha katei ka nongbah.
Kumba la tip hi ba ka Pakistan ka la pynkhreh ban pynlong noh ia ka ilekshon paidbah hapoh ka ri ha ka 8 tarik u Rymphang jong une u snem 2024 bad kumta ruh ki seng bapher ki la pynlong ia ki jingïalap ilekshon ha ryngkat ki kular ba ki la khlei hakhmat u paidbah nongshong shnong jong ka ri ban ioh ia ka jingkyrshan bad ka jingshaniah na u paidbah bad ba kin ioh ban synshar bad ban pyn-urlong ia ki jingthmu bad jingangnud kumba ki la ap khmih lynti baroh shi katta.
