Nongstoiñ, K’Lyngkot 24
Ka kynhun ïalehkai jong ka Khliehmawlieh YC ka la jam sha ka kyrdan ba ha khlieh duh jong ka miet ïakheiñ point ha ka lympung ïalehkai NDSA Premier League Football Tournament 2023-24.
Kane ka la wan hadien ba ka la ïoh ban khur haduh 19 point na ki 7 sien ïalehkai, katba ka Mawlarshong ka la wan ba-ar hadien ba ka la khur 17 point na ki 8 sien ïakhun.
Na ka liang ka Pyndengrei SCSC pat mynta ka la hiar sha ka kyrdan kaba lai ha ka miet ïakheiñ point ha kaba na ki hynñiew sien ïakhun ka la kamai 16 point, katba ka Upper New Nongstoiñ ka la wan ha ka kyrdan kaba saw hadien ba ka la ïoh ban khur 12 point na ki phra sien ïakhun.
Ka Mawkawah ka la don ha ka kyrdan ba san hadien ba ka la ïoh ban khur 10 point na ki phra sien ïakhun, hynrei watla katta ruh ym shym la pat lah ban ong mano ba ïoh khur ïa ka nam lahduh mynta ka samoi namar baroh ki kynhun ïalehkai ki dangdon sa mar katto katne tylli ki jingïakhun.
Na ka liang ka Football Committee ka NDSA ka la pyntip ba ka jingïalehkai semi final jong ka 1st Division kan long ha ka sngi Palei ha ka por 11:30 mynstep hapdeng ka Nongkhlaw pyrshah ïa ka Mawïong Pyndengrei bad ha ka por 1:30 mynsngi kan long hapdeng ka Nongstoiñ F.T pyrshah ïa ka New-Nongstoiñ.
