Shillong, K’Lyngkot 24
Ka kynhun ïalehkai kriket jong ka Jylla ka la lah ban pynliem noh ïa ka Mizoram da 3 wiket ha ka sngi kaba saw bad kaba khatduh jong ka U-23 men’s Col CK Nayudu Trophy ha ka sngi Balang ha Nadiad, Gujarat.
U Kevin Christopher sa shisien u la ïalehkai bha kum u kapten, watla um shym la lah ban tied bun run, pynban ka jinglah ban kynjop sha ki 40 run (not out) ka la pynlong ïa ka kynhun jong u ban kynjoh sha ka thong.
Kum ban shu pynkynmaw, ka Meghalaya ka la lah ban pynkhyllem ïa ki nongtied ka Mizoram na ka bynta ban kamai 220 rin ha ka inning kaba nyngkong bad hadien ka Meghalaya ka la lah ban kamai 259.
Hadien ka Meghalaya kaba la lah ban pynkhyl-lem ïa ki nongtied ka liang pyrshah na ka bynta ban kamai 232 run ha ka inning kaba ar bad ban buh ïa ka thong ha ki 194 run.
Haba bteng na ki 30/2, u Nishanta Chakra -borty (39 run na ki 134 bol) bad u Bipin Kumar Ray (26 run na ki 80 bol) ha kaba ka la kynjoh sha ki 59 run na ka bynta ka wiket kaba lai.
Watla ki nongtied ki la bteng ban ïalehkai bha, pynban ka Mizoram ka la lah ban pynhap wiket. U PM Santhosh uba khlem shah pynhap wiket u la tied 13 run na ki 28 bol, katba u Kevin u la lah ban kynjoh sha ka thong ha ki 51 bol.
U Kevin, uba la lah ban kamai arspah run, mynta u la long uba saw ha ka jinglah ban kamai da 423 run ha ki lai sien ïakhun.
Kumba ka long mynta ka Meghalaya ka la lah ban khur jingjop ha baroh lai sien ïakhun ha kaba ka la ïaryngkat mar 19 point bad ka Nagaland. Te kumta kane ka kynhun ïalehkai ka ri kan wanphai shwa sha la ïing na ka bynta ban ïakhun pyrshah ïa ka Arunachal Pradesh naduh 28 tarik mynta u bnai.
