Shillong, K’Lyngkot 24
Ka Merinda F.C, Umphyrnai SC bad ka Mawreng ki la long ki ar tylli ki kynhun kiba la bat ïa ki kyrdan ba hakhlieh jong ka Group-A bad Group-B ha ka lympung ïalehkai Under-16 Boys Football League 2023-24 ba la pynïaid da ka Shillong Sports Association.
Kine ki ar tylli ki kynhun ki la khur jingjop haduh san sien lynter na ki san sien ïakhun bad ban kamai mar 15 point.
Ha ka jingïakhun kaba la long ha ka sngi Balang ha SSA Stadium, ka Merinda FC ka la lah ban pynliem sa ïa ka Lumshyiap SC da 5-0 kol. Ïa kine kol la thep da u Bestius Nongbsap ha ka minit kaba 2, Mebankhraw Nongrum (18), Mebankitlang Mawlong (26), Lumlang M. Mawlong (34) bad u Ïaiteibor Kurbah (48).
Ka Umphyrnai ka la pynliem noh ïa ka Shillong Soccer Scout da 3-0 kol. Ïa kine kol la thep da u Ïarapkyrmen Kharkongor ha ka minit kaba 7, Ricky Kharkongor (39) bad u Mewankyrshan Nongrum (57).
Ha kiwei pat ki jingïakhun jong ka Group-A, ka Mawreng SC ka la pynliem noh ïa ka Mawpat SC da 2-1 kol. Ïa kine la thep da u Mewanteiskhem Marbaniang (12) bad u Banshemphang Jana (43), katba u Calvinnidi Pyngrope (59) u la lah ban pynphai kylla shi kol ïa ka Mawpat.
Ka Mawlai SC ka la pynliem noh ïa ka Pay For Right F.A da 2-1 kol na ka bynta ban kamai 9 point na ki saw sien. Ïa kine la thep da u Manbha Nongkhlaw (3) bad u Pynphyrnai Kharmujai (36), katba na ka PFR la thep da u Rafield Nongkynrih (23).
Ka jingïalehkai jong ka 1st Division Football League kan bteng biang ha ka sngi Palei hapdeng ka Nongrim Hills SC pyrshah ïa ka Mylliem SC ha ka por 2:15 janmiet.
