Ha kine ki sngi, ngi lap ba ka jingïapher ha ki kam saiñpyrthei ka ktah shimet pynban bad ka pynkylla nongshun ïa ki para nongïalam bad nongbud jong ki seng bapher-bapher. Ngi ïohi ïa kane khamtam ha ka jingïaid lynti jong u nongïalam ka seng Congress, u Rahul Gandhi, ha Assam kum shi bynta na ka ‘Bharat Jodo Nyay Yatra’. Ngi ïohi ïa ka jingkynthah hapdeng ki nongïalam ka Congress bad u Myntri Rangbah ka Assam, u Himanta Biswa Sarma, uba mynshwa u ju don bad ka Congress bad mynta u don bad ka BJP. Shisien peit ïa kine ki jingkynthoh, ym sngewkop shuh ba ki dei tang namar ka jingïapher saiñpyrthei, hynrei ka la dei syndon ka jingïashun shimet. Hynrei kane kam dei tang ha Assam, hynrei la jan ha ka Ri baroh kawei. Mynta ba la jan sa ka ilekshon Lok Sabha, ngin sa nang ïohi ïa ka jingkynthah/jingkynthoh/jingkynnoh shimet kiba ym don jingïadei eiei bad ka kam saiñ hima sima.
Ha kane ka jylla jong ngi pat, ngim pat da lap than ba kan long kumne watla ka jingsdang ka don. Barabor ki nongïalam saiñpyrthei hangne ki kiar na ka kynthoh shimet bad halor ki kam kiba ïadei bad ka synshar ka khadar. Ki ïaleh ban kynthoh halor ki mat ki jura bad ïa ki kam kiba ïadei bad ki paidbah. Lehse sharud shakiar ki lah ban ïa kynthoh shimet, hynrei kam da kham paw than ha ki rynsan kiba lah ban ïa tip paidbah. Ngi kyntu ïa baroh kiba ïadon bynta ha ki kam saiñ hima sima ban ïa kiar katlah katïai na ka jingkynthoh shimet khamtam da ki kyntien tohmet ki bym wanrah jingmyntoi eiei, hynrei kiba lah ban pynkhluit pynban ïa ki paidbah bad pynlong nongshun hapdeng ki nongshong shnong tang namar ka jingbym lah ban long adkar ha ka ktien ka thylliej.
Ki Khasi ki ju ong ïa kane – Ka Ktien Kaba Tam – bad lada bakla ha ka ktien, ka lah ban mih sa ka thma ktien, bad kaba don ïa ka bor ban pynmih sa kiwei pat ki kam ïakynad ki bym sngewtynnad. Hooid, ki don ki ‘riew paidbah kiba sngewtynnad lada mih ka jingïakynthoh shimet hapdeng ki nongïalam saiñpyrthei tangba kum ki nongïalam kim dei ban ngop ha ka jingsngewtynnad ki paidbah. Tangba kiba bun na ki nongshong shnong kim sngewtynnad bad ki phai khmat sha ki nongïalam kiba lah ban pyni ïa ka saiñdur na ka bynta ka lawei jong ki bad ka jylla. Kim da don por than ban ïa sngap ïa ki jingkynthoh shimet. Hynrei kin ïa pynshong nongrim ïa ki nia ki jutang kiba shisha bad kiba don jingmut.
Ka saiñpyrthei, lada ym nang ban kren ban khana, ka dei kaba pynbun nongshun bha. Teng-teng ha ka jingshongshit khlem nongrim, la kren ïa ki kyntien kiba lah ban pynsngew babe kylla. Ha ka pyrthei ‘Mobile Phone’ mynta, ka jynjar ban kyntait ïa kaei kaba la kren namar ki briew ki ïoh lad ban ring dur ïa ki jingkren. Shisien ba la bakla u thylliej, kan eh bha ban phai dien na kaei kaba la dep ban kren. Ha ki snem kiba mynshwa, kam da pher than bad dang don ka lad ban ïa buhrieh. Mynta, mar ïa ïoh ring dur uwei, sa tang katto katne minit, kato ka dur khih ka la saphriang kylleng bad yn ym lah shuh ban leh eiei. Namarkata, hap ban long adkar ha ki rynsan paidbah bad dei ban hikai ïa kiwei ruh ba kin long kumta.
Nangne shakhmat, baroh ki dei ban shim jinghikai na ki jingjia kiba wanrah ïa kiei-kiei ki bym sngewtynnad haba la tam ka ktien. Kiar beit na ka jingïakynthoh shimet bad ki jingkynthoh ki bym wanrah jingmyntoi ïano-ïano. Ki nongïalam kiba lah ban teh lakam ïa la u thylliej, ki dei kiba stad bad ba shemphang bad kiba la ih bha ha ka pyrkhat ka pyrdaiñ. Ha kiba kum kita kiba bun na ki nongshong shnong ki kwah ban shah ïalam bad ym ha kito kiba shu nang tang ban kawang ktieh shimet khlem da tip eiei halor ki mat ki jura.
