Shillong, K’Lyngkot 24
U rangïalehkai phutbol ka Jylla, u Phrangki Buam un ïohpdiang da ka khusnam ‘Kiang Nangbah’ na ka Sorkar Jylla halor ki jingnoh synñiang ha ka kam ïalehkai.
Ïa kane la pynbna dangshen ha ka jingrakhe ïa ka lyngkhuh jingïoh ïa ka Jylla ba pura kaba 52 ne Meghalaya Day, kaba la long ha District Auditorium and Library kaba ha Tura.
Kumba ka paw, u Phrangki un dei u rangïalehkai uba saw na Jaiñtia Hills ban ïohpdiang ïa kane ka khusnam kaba kyrpang na ka Sorkar Jylla kata hadien u Marlangki Suting, Lekini Suting bad u Halen Nongtdu.
Haba phai sha ka jingïaid lynti ha ka kam ïalehkai, u Phrangki u dei u rangïalehkai uba la san napoh ka shlem ai jinghikai jong ka Sports Authority of India (SAI) STC Shillong bad hadien u la leit ïasoh sha ka Royal Wahingdoh FC, kaba ïashim bynta ha kito ki por ha ka Shillong Premier League.
Hadien katto katne por utei u rangïalehkai shapdeng u la leit ïasoh sha ka Shillong Lajong bad u la sdang ban ïalehkai nyngkong eh ha ka I-League ha u snem 2018.
Kumba ka paw u Buam u la long u rangïalehkai kum u rangthep kol ba kynsai ha ka SPL bad u la wan ba-ar napdeng ki nongthep kol ha ka I-League 2018-19 ha kaba u la lah ban thep 24 kol ha baroh ar ki lympung ïalehkai. U la ïadon bynta ruh ha ka Meghalaya State League na ka Shillong Lajong, kaba la rah ïa ka nam lahduh ha u 2019.
Hadien ba Lajong ka la shah pynhiar kyrdan noh, u Phrangki u la leit ïasoh (loan) sha ka Bengaluru United ha ka aïom ïalehkai 2019-2020. Hadien u la leit ïasoh sha ka FC Goa ha ka aïom ïalehkai 2020-2023, hadien une u rangïalehkai u la leit ïasoh (loan) sha ka Mohammedan na ka bynta ka aïom ïalehkai 2021-2022.
Khatduh ei hashwa ba un wanphai sha ka Lajong mynta u snem, u Phrangki u la pynïasoh sha ka Real Kashmir bad u la ïoh ban ïalehkai khyndai sien.
Te kumta une u rangïalehkai un ïohpdiang ïa katei ka khusnam kaba kyrpang ha ka sngi rakhe ïa ka Republic Day ka ban long ha ka 26 tarik mynta u bnai ha kane ka nongbah.
