Vijayawada, K’lyngkot:
U Myntri Rangbah jong ka Andhra Pradesh u YS Jagan Mohan Reddy u la pyllait ïa ka pisa kaba T. 46.90 klur na ka bynta ban siew sha 407,323 ngut ki nongïoh myntoi kiba la don jingthmu ban shim ram ha kaba ïadei bad ka jingshna ïing na ki jaka kynshew pisa kiba hap hapoh ka skhim Navaratnalu-Pedalandariki Illu.
Ïa ka jingsiew la sam da arsien ha ka shi snem. Ha kaba ïadei bad ka jingpynhai halor ka pisa kaba la don ha ka jaka treikam jong u kaba don ha Tadepalli, u Jagan u la ong ba ka jingsiew ïa ka pisa kaba long da palat lai per cent ha ka Bank Loan kaba mar T. 35,000 kan sa ïarap ïa ki nongïoh myntoi ha kaba kin sa lah ban siew tang 25 pisa ka sut ha ka ram na ka bynta ka jingshna ïa ki ïing jong ki ha Jagananna Colonies.
Kum ka jingkdew ba ki jaka kynshew pisa ki la pynbonkam ïa ki Loan shna ïing ha ka sut kaba 9 haduh 11 per cent, u la ong ba ka sorkar jylla ka la rai ban siew ïa ka pisa da palat lai per cent khnang ban lah ban ym buh jingeh ei ei ïa ki nongïoh jingmyntoi.
Haduh mynta, ka sorkar ka la lah ban ïarap ïa ki Bank Loans kaba la kot sha ka T. 4,500.19 klur sha ki 12.77 lak ngut ki nongïoh myntoi, u la bynrap. Ha kaba ïadei bad ka jingbatai bniah halor ka Housing Scheme, u Jagan u la ong ba ki la don kumba 31.19 lak tylli ki dulir ba la sam sha kito ki briew kiba duk ha kaba ki la don palat 22 lak tylli ki ïing kiba dang don hapoh ka jingshna. Ki la don kumba 8.6 lak tylli ki ïing ïa kiba la dep ban aiti sha ki nongïoh myntoi hadien ba la dep shna ïa ki, u la bynrap.
