Kolkata, K’lyngkot:
Shi bynta kum ka jingbuh jingeh ïa ka kynhun synrop hapoh ka “INDIA”, ka Myntri Rangbah jong ka West Bengal ka Mamata Banerjee ka la rai hynnin ka sngi ba ka Trinamool Congress (TMC) kan sa ïakhun ha ka ilekshon Lok Sabha ka ban sa wan tang marwei ha ka jylla.
Ka la pynpaw ba kam shym la don ka jingïakren kaba biang ha kaba ïadei bad ka jingïasam ïa ki konstitwensi bad ka seng Congress; ka dkhot kaba hakhmat eh jong ka kynhun synrop, bad kane ka la long ka daw halor ka jingai rai jong ka. “Katba nga ai jingmut sha ki, ki la kyntait ïa baroh,” la ong ka Banerjee. ” Naduh kane ka por, ngi la rai ban ïakhun marwei na ka bynta ka ilekshon ha Bengal.”
Ka jingpynbna jong ka Banerjee halor ka rai jong ka, ka la long hadien ba ka la ïaphylliew jingmut bad u nongïalam jong ka seng Congress u Adhir Ranjan Chowdhury, uba la kynthoh ïa ka Myntri Rangbah jong ka West Bengal, ha kaba u la ong ïa ka ba ka dei ka ‘riewshim kabu, bad ong ba ka seng kan sa ïakhun ïa ka ilekshon khlem ka jingïarap jong ka. Kumba la ïathuh da u Adhir Ranjan Chowdhury hadien ba la khmih bniah ïa ki kaiphot la ong ba ka seng TMC ka la thmu ban pynïakhun ïa ki kyrtong ha baroh ki 42 tylli ki Lok Sabha konstitwensi ha West Bengal.
