Jowai, K’Lyngkot 24
Ka lympung ïalehkai 3rd Sniawbhalang Football Tournament ka la poi sha kaba kut ha ka sngi Ba-ar ha kaba ka Sohphoh SC ka la rah ïa ka nam lahduh hadien ba ka la lah ban pynliem noh ïa ka Nongkhroh SC da 2-0 kol.
Ïa kane ka jingïakhun final la pynlong ha Wahïajer Sport Complex kaba don ha ka shnong Wahïajer, West Jaiñtia Hills District.
Ha kane ka jingïalehkai la wan ïashim bynta haduh 1830 ngut ki rangïalehkai na ki 61 tylli ki kynhun na ki 72 tylli ki shnong kiba don hapoh ka Nartiang Constituency.
Ka Sohphoh kaba la long ka lahduh, ka la ïohpdiang ia ka song pisa kaba T.4 lak tyngka ryngkat ka trophy bad ka kynhun kaba wan ba-ar (Nongkhroh SC) ka la ïoh T.1.5 lak. Ïa ka nam Best Player of the Tournament la ïohpdiang da u Sumar Suting, ka nam Best Goalkeeper ka leit sha u Embha Rymbai ha kaba kine baroh ar ngut ki dei na ka Sohphoh, katba ïa ka nam Top Scorer la ïoh da u Deciderius Pyrtuh na ka Nongkhroh uba la thep haduh 7 kol ha kane ka lympung. Kine baroh lai ngut ki rangïalehkai ki la ïoh rah mar kawei ka Scooty.
Ïa kane ka lympung la wan ban pynhap pyrda da u Myntri Rangbah ka Jylla u Conrad K. Sangma ha kaba la iadon lang u Symbud Myntri Rangbah u Bah Sniawbhalang Dhar bad kiwei.
Na ka liang u Bah Sniawbha u la ong ba ïa kane ka lympung la pynlong shisien ha ki 4 snem bad tang ki rangïalehkai kiba napoh ka Nartiang Constituency hi kiba ïoh ban ïashim bynta.
La sakhi lang ïa kane ka jingïakhun final da ki hajar ngut ki paidbah ka thaiñ Nartiang bad na kylleng ki shnong ka District.
