Jaipur, K’lyngkot:
Ka North India ka dang don hapdeng ka jingshah ktah na ka jingjur jong ka jingkhriat, ha kaba kumba la sakhi, la ong ba ka Delhi-NCR ka la ïoh ïa ka jinghap jong u slap uba malu-mala. Ka India Meteorological Department (IMD) ka la dep ban ïathuh lypa ba kane ka jingkhriat ha kiba bun ki bynta ba shaphang Shatei jong ka ri kan sa ïai bteng haduh ka 27 tarik, Kyllalyngkot. Ka IMD, ka la ïathuh ba ka jingkahdum jong u lyoh kan sa ïai bteng ha ka por mynmiet bad mynstep ha Punjab, Haryana, Chandigarh, bad Uttar Pradesh haduh ka 27 tarik.
Ki bynta ba bun jong ka Rajasthan ki la ïai shah ktah ha ka jingkhriat tasam bad ka jingkahdum jong u lyoh khyndew ha kaba Fatehpur ka la long kawei na ki jaka sor kaba la shah ktah jur na ka jingkhiat ha ka jylla, la ïathuh ka Meteorological Department. Ka Fatehpur kaba don ha Sikar distrik ka la ïohmad ïa ka jingkhriat kaba jur da 1.6 Degree Celsius ha kaba la bud da ka Alwar ha kaba ka jingkhriat ha ka por mynmiet ka la long da 2.8 Degrees Celsius ha ki khyndiat sngi ba la leit.
Kiba bun na ki jaka ki la ïohmad ïa ka jingkhriat kaba hapoh ka 6 Degrees Celsius, kumba la ïathuh ka tyllong khubor. Ka Karauli ka la ïohmad ïa ka jingkhriat kaba 3.3 Degrees Celsius, ka Churu da 3.7 Degrees Celsius, ka Pilani da 3.6 Degrees Celsius, ka Bhilwara da 4 Degrees Celsius, ka Anta (Baran) 4.4 Degrees Celsius, ka Sikar da 4.5 Degrees Celsius, ka Ganganagar 5 Degrees Celsius, Chittorgarh bad ka Bikaner 5.5 Degrees Celsius, Sangaria (Hanumangarh) 5.6 Degrees Celsius, Jalore 5.8 Degrees Celsius bad ka Dabok (Udaipur) 5.9 Degrees Celsius, la ïathuh ka kaiphot kaba la wan na ka tnat Met. Ka jingkahdum jong u lyoh khyndew ka la long ha ki katto katne ki bynta jong ka jylla, la ïathuh ki heh ba dei khmih ïa ka jinglong ka suiñ bneng.
