Lucknow, K’lyngkot:
U Myntri Rangbah jong ka Uttar Pradesh u Yogi Adityanath hynnin ka sngi u la ong ba ka jingphohsniew kaba la sanspah snem jong ki briew ka India na ka bynta ka Ram Temple ha Ayodhya, ka la urlong.
Ha ka jingïakren halor ka nongbah bakhuid hadien ba la dep ban pynkyntang ïa ka Ram Temple, u nongïalam jong ka seng BJP u la ong ba ka dei ka sien kaba nyngkong ha ka khana pateng ba ka kynhun kaba hakhmat ka la hap ban ïakhun tyngeh na ka bynta ban pynïoh ïa ka jaka kaba shisha na ka bynta u blei jong ki.
Haba ïakren halor ka ‘kar sevaks’ ne ki kynhun kiba ïakhih ban dawa ïa ka jaka mane blei ha u snem 1990, u la ong ba mynta yn ym don shuh ka Curfew ne ki jingïasiat ha Ayodhya. U Yogi Adityanath, uba la donlang hapoh ka rynran ba la pynkyntang ïa ka Ram Temple ba la pynïaid da u Myntri Rangbahduh u Narendra Modi, u la ong ba baroh kawei ka ri India ka la long ka “Ayodhya Dham”.
U Yogi Adityanath u la ong ba u Narendra Modi u la long u nongïalam ba pawkhmat jong ka pyrthei. Ki la don kumba 17 ngut ki briew kiba la shah pynïap ha ki ar tylli ki jingjia ïasiat ba la jia ha Ayodhya ha u Risaw jong u snem 1990. Kum shi bynta ban pynkynmaw halor ka jingjia, u la ong ba ki la don bun ngut ki briew kiba la aiti ïala kajong ka jingim na ka bynta ka jaka mane blei. U Yogi Adityanath u la ong ba ïa ka jaka mane blei la shna ha ka jaka ba ki kwah.
