Beijing, K’lyngkot:
Ki bor pyniaid ka China ha ka Sngi Ba-ar ki la pyntip ba u jumai ba 7.1 Magnitude u la pynkhynñiuh ia ka thaiñ Kyrgyzstan- Xinjiang ha katei ka sngi, ha kaba katto katne ngut ki la mynsaw ha ki katto katne ki iing briew kiba la khyllem ha katei ka jingkhynñiuh.
Utei u jumai la ong ba u la khynñiuh ha ka por kumba 2:09 jong ka step Sngi Ba-ar ha ka jing jylliew kumba 22 km (13 miles) ha ki thaiñ lum jong ka bynta khappud ha Wushi County kaba don sha ka phang Northwest jong ka nongbah Xinjiang jong ka China. Ia utei u jumai la lah ban ïohsngew bha na Urumqi, Korla, Kashgar, Yining bad ha ki thaiñ ba marjan.
