Mairang, K’Lyngkot:
U District Magistrate ka Eastern West Khasi Hill District u Bah G Kharmawphlang, IAS, u la pyntreikam da ka kyndon 144 CrPC kaba khang bad mana pyrshah ïa ka jingïaid jong ki kali bad trok kiba ïaid ha shi lynter ki surok jong ka Eastern West Khasi Hills District khamtam ha ka surok Mawmaram-Nongthliew-Mawmih-Mawlyndep.
Ka kyrwoh khubor na u District Magistrate, ka ong ruh ba ka jingïaid jong ki kali kiba kit palat ïa ka 9 ton ha kine ki surok ka la pynjot bad pynjulor ïa ki surok. Ka wanrah ruh ïa ka jingma ïa ka ïaid ka ïeng jong ki nongshong shnong bad ïa kiba ïaid lynti na kine ki surok.
Kumta lada lap ïa kiba ïaleh pyrshah yn pynshitom katkum ka kyndon aiñ 188 jong ka Indian Penal Code bad kane ka jingmana kan treikam noh mardor naduh ba la pynmih ïa kane ka hukum.
Ha kawei pat ka khubor, u District Magistrate ka Eastern West Khasi Hill District u la pyntreikam da ka kyndon 144 CrPC kaba khang bad mana pyrshah ïa ka jingtih bad khlong maw be-aiñ ha shi lynter ka surok Tiehnongbah-Laitnongrim.
Ha ka kyrwoh khubor ba la phah u la ong, kane ka jingtih bad khlong maw beaiñ ka wanrah ka jingpynjot pynsniew ïa ka surok bad ka wanrah ruh ka jingma ïa ki nongshong shnong bad ki briew kiba ïaid lynti na kane ka surok.
Namar kata, u District Magistrate u la ong ba kino kino kiba ïaleh pyrshah ïa katei ka hukum yn pynshitom katkum ka kyndon 188 jong ka Indian Penal Code.
U la ong ruh ba kane ka hukum kan treikam mardor tad ynda pynbna da kumwei pat.
