New Delhi, K’lyngkot:
Ki la don palat 150 tylli ki liengsuiñ kiba la sangeh treikam ha Indira Gandhi International (IGI) Airport ha Delhi, na ka daw jong ka jingkahdum jong u lyoh ha kane ka por nalor ba ka la shah pyrkhing lypa na ka jingpynkhreh ïa ka Republic Day. Kumba la sakhi, la ong ba ka jingshit jingkhriat ha ka nongbah Delhi, ka la kiew sha ka 6.9°C, na ka 6.1°C ha ka sngi Ba-ar, ha kaba kumba la ïathuh da ka India Meteorological Department (IMD) la ong ba ka jingkahdum jong u lyoh kan sa ïai bteng ha Delhi.
“..Na ka daw jong ka jingbym lah ban ïohi jngai ha Delhi…ka jingmih bad ka jingtreikam jong ki liengsuiñ ka la shah ktah jur. Ki nongleit jingleit ki la shah bthah ba ki la dei ban khmih bniah ïa ka rukom long ka suiñbneng haba ki thmu ban leit jingleit da ki liengsuiñ,” la ong ki heh nongpynïaid jong ka Airline.
