Seoul, K’lyngkot:
Ka South Korea ha ka Sngi Balang ka la pyntip ba ka North Korea ka la pyrshang pynher biang sa ia kiwei pat ki katto- katne ki jait ‘namding jong katei ka ri bad kiba la leit poi sha ki bynta jong ka Yellow Sea ha katei ka sngi.
Tang hadien khyndiat kynta ba la pynbna da ka South Korea, ka North Korea ruh ka la pyntikna bad ong ba katei ka long ka khubor ba shisha namar ka North Korea ha kane ka kynti ka dang pyrshah sa ia kiwei pat ki jait ‘namding katba ka dang pyrshang ban pynbit pynbiang ia u ‘namding ‘Pulhwasal-3-31’ ba thymmai jongka.
La ong ba ka North Korea naduh ba sdang mih une u snem thymmai hi, ka la sdang ban pynjur ia kitei ki kam pynher ‘namding bad ka la sdang ban pynïar ia ki kam ‘Nuclear’ jongka wat hapdeng ki jingmaham jong kiwei pat ki ri ba marjan khamtam ka South Korea bad ka United States. Hynrei la ong ba ka North Korea khlem jingsalia, ka la leh ha la ka jong ka mon bad ka ju pynher ‘namding khah-khah sha ki bynta ba khappud bad ka South Korea khlem da pyrkhat ruh ia ka jingma bad ka jingshngaiñ jong kito ki paid nongshong shnong ka South Korea kiba don ha ki thaiñ khappud.
Ki heh ka tnat iada jong ka South Korea ha katei ka sngi ki la iathuh ba ki shipai ka South Korea ki la iohi ia katto katne ki ‘namding ba la ther da ka North Korea sha ki bynta jong ka Yellow Sea ha ka por kumba 7:00 baje mynstep.
