Washington, K’lyngkot:
Ka tnat shipai duriaw jong ka US ha ka Sngi Balang ka la mih noh da ka jhad Gunston Hall ban leit pyniasoh sha ka jingkilan kaba heh bah jong ka NATO ka bym pat ju jia mynno-mynno ruh naduh ki por jong ka ‘Cold War’ ha ki por barim.
Kumta, la ong ba kumba 90,000 ngut ki shipai na ki ri bapher kiba kynthup hapoh jong ka NATO ki la mih ban leit pyniasoh sha katei ka jing pyn kilan ‘Steadfast Defender 2024’ ka ban sdang naduh u Jymmang jong une u snem.
Palat 50 tylli ki jhad bad ki liengsuiñ ka US kynthup ia ki liengsuiñ kiba kit tiar bad kumjuh ruh kito ki liengsuiñ thma, nangta shuh- shuh kumba 80 tylli ki jet thma, ki helicopter, ki drone bad palat 1000 tylli iakhun thma ki ban kynthup ia 133 tylli ki tup bad 533 tylli ki kali thma, la ong ba kin ïadon bynta ha katei ka jingpynkilan ka ban ïashim bynta da baroh ki ri kiba hap hapoh jong ka kynhun NATO.
Naba la ong ba katei ka jing pynkilan ka long ban pynkhlaiñ bad pyn tikna ia ka jingiada naka bynta jong baroh kitei ki ri kiba don hapoh jong ka kynhun NATO bad katei ka jing pynkilan ha kane ka sien mynta ka long ruh kaba heh tam ba katei ka kynhun kam pat ju leh mynno- mynno ruh mynta da ki phew snem.
Haba iadei bad kane, la ong ba ka NATO kam shym pynpaw kyrteng eiei ia ka Russia watla katei ka jing pynkhreh jongka la i-kumba ka long pyrshah ia ka thma jong ka Russia. Hynrei ka dei pat ka jingshisha ba ka NATO ka la pynkhreh ban iakhun thma pyrshah ia ka Russia namar kumba la iohi ha kine ki khyndiat por ba la leit, ka Russia ka la byrngem pyrshah ia ki dkhot jong ka kynhun NATO bad kumta ka NATO ruh kam banse ban pynkhreh ban iakhun bad ban ai jingiada ia kito ki ri kiba rit kiba don hapoh jongka.
Hynrei la ong ba lada ym dei na ka jingleit hiar thma jong ka Russia pyrshah ia ka Ukraine, ka NATO kan ym jin da la leh ia kane namar mynta la kumba 70 snem kam ju don kano- kano ka thma hapoh ka dew bah Europe hynrei dei ka Russia ka la sdang ia kane ha kane ka por.
U Lamphang jong ka NATO, u Matthias Eichenlaub, u la pynbna paidbah ha ka Sngi Balang ba ka NATO ha katei ka sngi ka la sdang ia ka jing pynkilan kaba heh duh bad ka bym pat ju jia naduh ki snem 1988.
