Shillong, K’Lyngkot 28
Ka Meghalaya ha ka sngi sdang jong ka lympung U-23 Men’s Col CK Nayudu Trophy, ka la lah ban tied tang 203 run ha ka pali ba nyngkong bad hap lut baroh ki wiket.
Haba phai sha ka jingïalehkai kaba la long ha madan MCA, Polo, Shillong, ki nongtied ka Meghalaya kim shym la lah ban shan hakhmat ki nongkawang bol ka Arunachal Pradesh bad ki la lah ban tied tang 203 run.
Katba ki nongtied ka Arunachal Pradesh pat ki la lah ban ïalehkai jai jai bad haduh ba kut jong kane ka sngi, ki la ïoh 101 run bad hap tang 2 wiket bad duna pat 102 run ïa ka Meghalaya.
Kumba ka ju long baroh shi katta, ki kynhun kiba ju jop ïa ka jingkynting pisa ha Shillong, ki ju jied ban kawang bol nyngkong kaba ju plie lad bha ïa ki nongkawang bol ban lah tehlakam ïa ki nongtied ha kaba sdang.
Ka Meghalaya, ka la ïoh ka jingsdang kaba paka bha lyngba u Mrinal Das, uba la tied bha ha kaba tang na ki 20 bol u la kamai haduh 34 run, kata lyngba ka jingïarap ki 2 tylli ki hynriew run bad saw tylli ki 4 run.
Kiwei pat ki nongtied ka Meghalaya kim shym la lah ban neh slem hapdeng, ha kaba u Nishanta Chakraborty u la kamai tang 8 run, u Kush Agarwal u la kamai 11 run bad u Swastic Chettri u la kamai 6 run hynrei dei lyngba ka jinglah ban ïalehkai bha jong u kapten u Kevin Christopher ba la lah ban poi sha katei ka jinglah kamai run, kata hadien ba u la kamai 41 run na ki 42 tylli ki bol.
U Manish Sharma ruh u la lah ban ïalehkai bad ban dei tang ma u, marwei uba la kamai palat 50 run, kata ban tied 61 run na ki 62 tylli ki bol.
Haba wan ban tied ha ka pali kaba nyngkong, watla ka Arunachal Pradesh ka la duh wiket dang kloi, hynrei kam shym la duh mynsiem bad ïalehkai jai jai bad ban kot sha ka 101 run bad hap tang 2 wiket bad kumta kan khmih lynti ba ha ka step kaba bud kan lah ban nang tied run shuh shuh.
Kumjuh ruh na ka liang jong ki nongkawang bok ka Meghalaya kin kwah ban sdang thymmai ha ka sngi kaba bud bad ban ïaleh ban khur wiket dang kloi.
