Nongstoiñ, K’Lyngkot 28
Na ki phra sien ïakhun, ka Khliehmawlieh Youth Club mynta ka la poi sha ka kyrdan kaba hakhlieh duh ha ka miej ïakheiñ point namar ka la ïoh haduh 22 point na ka lympung ïalehkai phutbol ka NDSA Premier League Football Tournament 2023-24 jong ka kyrdan Super Division mynta ka samoi ïalehkai.
Ka jingïoh ban kiew jong ka Khliehmawlieh YC sha ka kyrdan kaba hakhlieh ryngkat ki 22 point ka dei ruh hadien ba ka la lah ban pynliem noh da 3-0 kol ïa ka Upper New Nongstoiñ kaba la long ha ka sngi Saitjaiñ jong ka taïew ba la lah ha madan NDSA, ha Nongpyndeng.
Shuh shuh haba phai pat sha ka kynhun ïalehkai jong ka Pyndengrei SCSC, na ki phra sien ïakhun ka la khur 19 point hadien ba kane ka kynhun ïalehkai ka la lah ban pynliem noh da 5-0 kol ïa ka Mawliehbah ha ka jingïalehkai ha kajuh ka sngi ha ka sngi Saitjaiñ ha madan NDSA, Nongpyndeng.
Haba phai sha ka kynhun ïalehkai jong ka Khliehmawlieh YC bad ka Pyndengrei SCSC, ym lah ban len kine ki dei ki kynhun kiba kham paw ha ka kyrdan Super Division jong ka NDSA ym tang ha kane ka samoi hynrei ha ki samoi ïalehkai kiba la lah, kumta kumba long mynta kine ki ar tylli ki kynhun kin sa don pat sa ka jingïakhun kaba khatduh hapdeng jong ki, ïa ka ban sa pyntip shen ïa ka tarik ha kaba lehse kan long ruh ka jingïakhun ka ban kham itynnad ban ïaknieh ruh ïa ka nam lahduh mynta ka samoi ha ka NDSA Premier League Football Tournament jong ka Super Division mynta ka samoi.
Shuh shuh haba phai pat sha kiwei ki kynhun ïalehkai kiba don ha ka Super Division ka NDSA Premier League, ka kynhun ïalehkai jong ka Marlarshong Sports Club kala wan ha ka kyrdan kaba lai ha kaba na ki 8 sien ïakhun kala ïoh ban khur 17 point, ka Upper New Nongstoiñ kala wan ha ka kyrdan kaba saw ha kaba kala ïoh 12 point na ki phra sien ïakhun, ka Mawkawah Football Club ka la ïoh 10 point na ki phra sien ïakhun, ka Sawlad Sports Club kala wan ha ka kyrdan kaba san ha kaba ka la ïoh khur 10 point na ki phra sien ïakhun.
