New Delhi, K’lyngkot:
Ka Russia ha kane ka por la ong ba ka la ai jinghikai ia ki shipai lade ba kumno ki dei ban leh bad ban sngewthuh lada jia ki jingbthei jong ki bom Nuclear. Kumta ruh la ong ba ka Russia ka la pynbthei ia ki bom Nuclear ha ki jaka ai jinghikai ia ki shipai lade khnang ba kin sngewthuh haduh katno katei ka jingbthei jong ki bom ba khlaiñ bor ka lah ban ktah ia ki bad kumno ki dei ban leh lada poi ha kum kitei ki khep.
Kumta la ong ba kitei ki tiar pynbthei kiba ka Russia ka la pyni bad ai nuksa ha ki shipai lade ki long kiba khlaiñ bad haba kitei ki tiar kin bthei, ka mih ka ding kaba kum u lyoh bad ha ka dur jong u tit ‘Mushroom’.
Kane ka jingai jinghikai jong ka Russia ha kane ka por ka long ban pynkhreh lypa lada khie ka thma Nuclear ha kano-kano ka por bym lah tip namar kumba la iohi mynta ba ki shipai jong ki ri bapher bapher kiba don hapoh jong ka kynhun NATO ruh ki la pynkhreh ban iakhun thma pyrshah ia ka Russia, kumba ka Russia hi ka la dep byrngem ia kitei ki ri jong ka kynhun NATO ba kan sa leit ban hiar thma ia ki ruh kumjuh kumba long ia ka Ukraine. Namarkata, la ong ba ka US bad kiwei pat ki ri ba bun jong ka NATO ha kane ka taiew ki la sdang ban pynkhreh ban phah ia palat 90 hajar ngut ki shipai ha ryngkat ki hajar tylli ki kali thma bad ki tup thma ba kin pyndonkam ha ka jingkilan jongki, kum shi bynta ban pynkhreh ia ka thma hadien ba la ïohsngew ia ka khubor byrngem na ka Russia.
Katei ka tiar pynbthei ba ka Russia ka pyndonkam ha kane ka por ka dei kaba la pynmih bujli ha ka jaka jong ka IU-59 kaba mynta ki la ñiew kum ka ‘Obselete’. Kumta la ioh jingtip ruh ba ki shipai ka Russia ki la pyndonkam da ki tiar nuclear IAB-500 bad kaba la iaryngkat hi bad ka jing pyndonkam ia ki bom RN-24.
