Islamabad, K’lyngkot:
Katkum ki khubor, la ong ba ki nongkyrshan jong ka seng Pakistan Muslim League-Nawaz (PML-N) ki la leit rah syndon da u sing bad u khla sha ka jingialang paidbah jong u Nawaz Sharif kaba la long ha ka Sngi Ba-ar hapoh ka nongbah Lahore jong ka Pakistan.
La ong ba kitei ki mrad ki dei kiba ïeng kum ka dak jong katei ka seng bad kumta ruh la wanrah sha katei ka jaka ha katei ka sngi hapoh ka konstitwensi jong ka National Assembly (NA)-130 kum shi bynta ban pdiang sngewbha ia u Myntri Rangbahduh barim jong ka ri- u Nawaz Sharif.
Kumta, la iohi ia ki dur ba la saphriang paidbah ba kitei ki paidbah nongkyrshan jong ka seng PML-N baroh ki la ia leit ban shondur lang hakhmat utei u sing bad u khla ba la thep hapoh ki ruh nar. Ym tang ha kane ka sien, hynrei ha ki por ba la leit ruh la ong ba ki nongkyrshan ka seng PML-N ki ju wanrah ia ki mrad khlaw sha ki jingialang paidbah kumjuh kumba la leh ha kane ka sien bad ka long ruh kum shi bynta ban pynskhem ia ka shap bad ka dak jong ka seng PML-N.
Watla katta, la ong ba u Nawaz Sharif u la dep kyntu lypa ia ki nongkyrshan ba kim dei ban wanrah ia ki mrad khlaw ba shisha sha ki jingialang paidbah ioh kan mih kano-kano ka jingjia ba sngewsih namar ka long ka jingma kaba khraw ia ki paidbah kiba don ha kito ki jaka.
Ha ka jan miet jong ka Sngi Ba-ar, la ong ba u Nawaz u la ai jingkren sha ki paidbah hapoh ka jingialang paidbah ba la pynlong ha NA-130, kaba long ruh ka thaiñ kaba un ïeng ban iakhun ilekshon.
