Jowai, K’Lyngkot 28
Ki khynnah ïalehkai ka Sabahmuswang Sports Club ki la khur ïa ka nam lahduh jong ka jingïalehkai ‘Under-13 Republic Day Cup Football Tournament’ hadien ba ki la pynliem ïa ki khynnah ka FAM da 2-0 kol ha ka jingïakhun final ha ka 26 tarik Kyllalyngkot.
Ïa ka jingïalehkai la pynïaid da ka West Jaiñtia District Sports Association kaba la long ha madan Kiang Nangbah Stadium Ladthadlaboh, Jowai.
Haba phai sha ka jingïalehkai, ka jingïakhun ba la buh por ban pyndep ka la kut da ka jingïakhaid khlem don ba thep kol. Dei hadien ba la rah ïa ka jingïakhun sha ka tie-breaker, ka Sabahmuswang ka la pynliem noh da 2-0 kol ïa ka FAM.
U Deputy Commis-sioner ka West Jaiñtia Hills District u Bah BS Sohliya u la wan ban pynhap pyrda ïa kane ka jingïalehkai kum u kongsan ha ka jingdonlang u District Sports Officer ka West Jaiñtia Hills u Bah Khroobok Passah, u working president ka WJD-SA u Bah EMH Passah nalor kiwei kiwei de ki nongïalam bad dkhot nongkitkam ka WJDSA.
Hadien ka jingïalehkai, u kongsan u la sam ïa ka khusnam sha ka kynhun lahduh bad kynhun ba wan ba ar da ka song pisa ryngkat ka trophy.
La sam ruh ïa ka khusnam ‘Man of the Match’ sha u Wohjrem Shylla jong ka Sabahmuswang, ka nam Best Goalkeeper sha u Benedict War jong ka FAM, ka nam Top Scorer sha u Deiwamitre Shylla jong ka Sabahmuswang bad ka nam Player of the Tournament sha u Dachanmitre Dkhar jong ka FAM.
