New Delhi, K’lyngkot:
Ka tnat Embasy jong ka US hapoh Bahamas ka la maham ia ki nongleit nongwan na US kiba thmu ban leit jngoh kai bad leit rung sha katei ka ri dew lynnong hadien ba la iohi ia 18 tylli ki jingjia shah pyniap klep tang hapoh jong une u Kyllalyngkot.
Kumta la ong ba ki heh ka United States ki la kyntu ia ki paidbah nongshong shnong ka US ba kin kiar na kaba leit sha katei ka ri namar ka jingma kaba ap ia ka jingim jong ki khamtam ha kum kine ki sngi ba ka jinglong-jingman ha katei ka ri kam long shuh kaba shngaiñ ia ki nongwei ba kin leit rung ne leit jngoh kai.
Katkum ba la shem ba naduh kaba sdang jong une u snem 2024, ki la don bun tylli ki jingjia shah pyniap ha katei ka ri bad tang hapoh jong une u bnai Kyllalyngkot, ki la don haduh 18 ngut ki nong United States kiba shu leit iap ei sha katei ka ri bad kiba shu shah pyniap dusmon ha ki jingjia bapher bapher.
Kumta lada jia ki paidbah kim lah ban kiar na kaba leit sha katei ka ri, ka US ka la kyntu ba ki dei ban da long phikir bad leh adkar bha ia ka leit ka wan bad ban peit thuh bha ia ka jinglong-jingman ha man ki jaka ba ki leit khnang ba kin ioh ban phah jingtip mar-mar haba wan kino- kino ki jingeh ne ki jingpynthut ha ka leit ka wan jong ki.
La ong ba wat ka tnat ba dei khmih ia ka jinglong- jingman ha katei ka ri ruh ka la maham ia ka jingjur ki kam runar hapoh katei ka ri ha une u snem bad ki jingjia bapher ba ki bor pyniaid kim lah ban tehlakam naduh ka jing pyniap briew, ka jingleit thombor hapoh ki iing- ki sem, ka tuh- ka thiem bad wat ka jingshah batbor ki kynthei khynnah bad samla ruh ka jur bha hapoh katei ka ri ha une u snem.
Kaba kham sngew khia ka long ba ka jingshah batbor ki kynthei ka ju jia la jan ha man baroh ki jaka sah jong ki riew shangkai ne ki briew ba nabar kum ki ‘Resort’ bad ha kiwei de ki jaka sah shipor jong kiba wan poi nabar.
