Guwahati, K’lyngkot:
Ka nongïalam barim jong ka seng Congress bad ka President barim jong ka Youth Congress ha Assam ka Angkita Dutta ka la pynpaw ba ka la rai ban leit pynïasoh noh bad ka seng BJP.
Kumba la ïathuh ka tyllong khubor, la ong ba ka Angkita Dutta ka la rai ban pynïasoh bad ka seng BJP ha Assam hynnin ka sngi, ka sngi U Blei.
Ha kawei pat ka bynta, u President barim jong ka All Assam Students’ Union (AASU) u Dipanka Nath ruh u la pynpaw ba un sa leit ban pynïasoh bad ka seng BJP ha kajuh ka lympung. Nalor ka Angkita bad u Dipanka, ka MLA barim jong ka seng Congress ka Bismita Gogoi bad u Vice-President barim jong ka AASU u Prakash Das kin sa leit ban pynïasoh bad ka seng BJP.
Ha kaba ïadei bad kane, u nongïalam barim jong ka seng Congress u Apurba Kumar Bhattacharjee u la pynpaw ba un sa leit ban pynïasoh bad ka seng Asom Gana Parishad (AGP), ka seng ba la ïatreilang bad ka seng BJP, mynta ka sngi ka 29 tarik, Kyllalyngkot.
Kum ban shu pynkynmaw, la ong ba ka Angkita Dutta ka la shah beh noh na ka jinglong dkhot hapoh ka seng Congress da 6 bnai ha ka 22 tarik, Ïaïong, 2023.
Ka la kynnoh ba ka la shah jrong kti ha u President jong ka Indian Youth Congress u Srinivas BV.
