Taipei, K’lyngkot:
Ka tnat iada jong ka Taiwan ha ka Sngi Saitjaiñ ka la pyntip ba palat 30 tylli ki liengsuiñ thma jong ka China ki la leit ban iaid tawiar kylleng sawdong jong ka Taiwan naduh ka Sngi Thohdieng.
Namar kumba ju ïohsngew hi man ka por ba ka China ka ju kam trai beit ia ka Taiwan bad ka ju kam ba ka Taiwan ka long tang ka bynta kaba pait na ka China. Kumta ruh ka China kan sa shim noh sha lade ia katei ka bynta ha kano-kano ka por bym lah batai.
La ong ruh ba naduh shwa jong ka ilekshon ha Taiwan kaba la pynlong ha ka 13 tarik jong une hi u Kyllalyngkot, ka China ka la dep maham lypa ia ki nongthep vote ba kim dei ban ai jingkyrshan ne ban jied ia u Lai Ching-te, namar utei u nongialam u long uba pyrshah jur ia ka China bad ka jing jied jongki ia utei u nongialam kan long ka jingkhot ia ka thma.
Watla katta, la ong ba utei u nongialam u la jop shisha ia katei ka ilekshon ha ka sien kaba 3 na ka seng Democratic Progressive Party, kaba long ka seng kaba kyntait jur ia ka jingkam jong ka China ba ka Taiwan ka long ka bynta kaba shu pait na ka China.
