Aizawl, K’lyngkot:
Ka kynhun kieng atiar barim jong ka Mizo National Front (MNF), Peace Accord MNF Returnees (PAMRA), ka la pynpaw ïa ka jingsngewkhia ha kaba ïadei bad ka jingpynshisha ba ka la don ka jingai jinghikai pyntbit ba la pynlong da ki lehnoh na Bangladesh hapoh ki bynta khappud jong ka Mizoram. Kumba la ïathuh da ka PAMRA, ka Parbatya Chattagram Jana Samhati Samiti (PCJSS), ba la tip ruh da ka JSS (Santu Group), ka kynhun na Chittagong Hill Tracts ha Bangladesh, la pyntikna ba la ïoh jingrip ha kaba ïadei bad ka jingdon ka jingai jinghikai pyntbit kumba ai ïa ki shipai ha Lunglei bad Mamit distrik kiba don ha Mizoram.U General Secretary jong ka PAMRA u C Lalthenlova, u la ong ba ki jaka ba la pynshisha ba ki la don ki jingai jinghikai pyntbit ha Lunglei distrik ki kynthup ruh ïa ka Salmore, Tara Banya, Chumochumi, Malchari (ki jaka sah jong ki longïing ki dkhot ka JSS Shanti Bahini), Bhalukkyachari, bad ha ka shnong Andar Manek.
Ha Mamit distrik ka jaka ba don ka jaka ai jinghikai ka don ha ka shnong Silsury (hapoh ka jingïalam jong u Company Commander Alo Chakma) bad ha Amchari (hapoh ka jingïalam jong u Commander Binanda Chakma).Kum shi bynta ban pynpaw ka jingsngewkhia ha kaba ïadei bad ka jingdon jong kine ki jingai jinghikai pyntbit hapoh ki bynta jong ka Mizoram, u Lalthenlova u la pynpaw ba ka la don ka jingap jingma ha kaba ïadei bad ka shongsuk-shongshngaiñ jong ki briew ha kaba u la ong kumne, “Ngi la shim khia bha ha kaba ïadei bad kane, bad ki briew kim don ha ka jingshngaiñ bad ki la don ha ka jingtieng jingsyier. Ngi buh ka jingkyrpad na ka sorkar Mizoram ba Kan pynsangeh bad khanglad ïa kum kine ki jingai jinghikai kham kloi katba lah. Ngi la buh ruh ka jingdawa ba kine ki ‘riewsniew ki dei ban shah pynphet noh na kine ki jaka ba ki don.” Ka PAMRA ka la buh jingmaham ba kada ka sorkar kam lah ban leh ei ei halor kane Kan sa shim da ki lad ki lynti ban lah ban pynphet noh ïa kine ki ‘riewsniew na kine ki jaka.
