Shillong, K’Lyngkot 28
Ka Laitkor Sports Club ka la lah ban pynliem noh ïa ka Mawkhar Sports Club ha ka lympung ïalehkai First Division 2023 ba la pynïaid da ka Shillong Sports Association ha First Ground, Polo ha ka sngi Saitjaiñ.
Kumba ka long mynta, kane ka jingjop jong ka Laitkor SC kan dei ruh kaba lai sien ha ka lympung Shillong Sports Association’s First Division 2023. Kane ka jingjop ruh ka la wan lyngba ka jingïakhun tyn-geh wat la ka la shah thep kol nyngkong hynrei ha kaba kut ka la lah pat ban jop da 3-1 kol.
Haba phai sha ka jingïalehkai, ka Mawkhar ka la ïoh ban thep kol nyngkong tang ha ka minit kaba 3 lyngba u Kyrmen Lyngdoh hynrei tang ha ka minit kaba 19 ka Laitkor lyngba u Euvasius Mawthoh ka la ïoh ban pynphai ïa kane ka shi kol.
Ha ka kylla miet, u Euvasius u la ïoh ban khyrwit ïa ka kol kaba ar ka jong u bad jong ka Laitkor ha ka minit kaba 76 bad dei ha ka minit kaba 85 ba u Banskhem Kharkongor u la thep ïa ka kol kaba lai.
Ka Laitkor kan dei ka club kaba nyngkong ban dep ïalehkai haduh saw tylli ki jingïakhun bad ban kamai 9 point na ki lai tylli ki jingjop bad kawei ka nam rem. Katba ka Mawkhar na ki lai tylli ki jingïakhun, ka dang ïoh tang shi point bad ban shah rem ar tylli.
Ka jingïalehkai ba bud jong kane ka lympung kan long ha ka 31 tarik mynta u bnai, ha kaba ka Umphyrnai Sports Club kan ïakhun pyrshah ïa ka Malki Sports Club ha ka por 2:45 janmiet.
