Pune, Kyllalyngkot:
Ki seng kiba don ha ka liang pyrshah ki la pynrem jur ha kaba ïadei bad ka jingpyntreikam jong ka Pune Municipal Corporation’s (PMC) halor ka jingthmu ban pyntreikam bad ban wanrah ki jingkylla ha ka jaka kaba 7 akar ha Katraj na ka jaka ïalehkai na ka bynta ban wanrah ïa ka kam khaïi na ka dud da ki hukum ba la wan na ka sorkar jylla.
Kum ka jingpynksan halor kane ka jingpyrshah, ki seng ka liang pyrshah, ki la ong ba kane ka jaka ïalehkai ka long kaba donkam na ka bynta kiba shong basah ha kane ka thaiñ, ha kaba ki la ong ruh ba ka rai jong ka sorkar ka la long pyrshah ruh ïa ka Supreme Court kaba la pdiang ïa ka jingong ba la dei ban pynneh pynsah ïa ka jaka ba la mang kum ka jaka ïalehkai.
Ïa kane ka jaka la aiti da ka sorkar jylla sha ka Katraj Dairy ha ki shiphew snem ba la leit na ka bynta ban pynheh pynïar ïa ka hynrei ka Civic Body ka la mang ïa ka jaka na ka bynta jong ka ha ka ban pyndonkam na ka bynta ban ïalehkai.
Ki seng ka liang pyrshah kiba kynthup ïa ka seng Congress bad Shiv Sena (UBT) ki la dep ban pynlong da ka jingïakhih pyrshah ïa u Guardian Minister u Ajit Pawar bad ïa ka PMC kiba la thmu ban pynkylla dur ïa katei ka jaka ha Katraj.
U heh nongïalam jong ka seng Congress ha ka nongbah u Arvind Shinde u la ong ba ka thaiñ Katraj ka dei ka jaka kaba dang rben bha ki khlaw ha kaba ym don jaka ba lait ban pynlong jaka ïalehkai, lait noh kane kawei ka jaka ba la mang da ka PMC.
“Ïa ka karkhana ba ju pynïaid ïa ka dud bad kiwei pat ki jait jingbam na ka dud la dei ban weng noh na ka shnong,” la ong u Shinde.
Ka seng AAP ruh ka la pynrem jur ha kaba ïadei bad kane, bad ong ba lada thmu ban pynkylla dur ïa kane ka jaka la dei ban rah ha ka ïingbishar na ka bynta ban pynpaw shai ha kano ka rukom ka PMC ka pynkheiñ ïa ka kyndon jong ka ïingbishar da kaba leh pyrshah ïa ka hukum jong ka Supeme Court halor kane ka jaka ba la mang.
