Shillong, K’Lyngkot 28
U Jannik Sinner u la ïoh rah ïa ka nam lahduh Grand Slam kaba nyng-kong eh hadien ba u la lah ban pynliem noh ïa u Daniil Medvedev ha ka jingïalehkai final jong ka lympung Australian Open.
U Sinner ba dang 22 snem na Italy, wat la ha kaba nyngkong u la shah tam ha ki ar tylli ki set, hynrei u la ïakhun tyngeh bad jop pat ïa ki 3 tylli ki set kiba sah, kata ban jop da 3-6 3-6 6-4 6-4 6-3.
U Sinner uba bat ruh ïa ka kyrdan kaba saw ha ka pyrthei, ha kaba sdang um shym la lah ban shan hakhmat ka jingkhlaiñ bad sted jong u Medvedev uba na Russia hynrei kat-ba dang ïaid ka jingïalehkai u la lah ban pynpaw pat ïa la ka jong ka sap.
Kane ka jingïakhun kan long sa kawei kaba la pynblad bad pynsngewsih noh ïa u Medvedev, naba lah ban pynkynmaw ba watla u la tam da 2 set ha ka jingïakhun pyrshah ïa u Rafael Nadal hynrei u la shah liem noh ha ka final jong u snem 2022.
U Sinner u la dei hok shisha ban rah ïa ka nam lahduh ha Melbourne, kata hadien ba u la lah ban pynliem noh ïa u Novak Djokovic uba dei u khlur ïalehkai ha ka semi-final.
“Ka long shisha ka jingsngew khraw. Nga hap ban shu kmen bad ïaid shakhmat, nga sngew ruh ba kumno kan sngew ha ka sien kaba nyngkong eh ban ïoh bat ïa ka nam lahduh,” la ong u Sinner.
U Medvedev ba la 27 snem bad uba bat ïa ka kyrdan kaba lai ha ka pyrthei, u la shah rem noh ha ki san tylli ki final na ki hynriew tylli kiba u la ïoh rung, kynthup kawei pyrshah ïa u Djokovic ha u snem 2021 bad u Nadal ha u 2022 ha Melbourne Park.
“Ka long shisha kaba sngewsih ban shah rem ha ka final hynrei ka kham biang ban ïoh rung sha ka final ban ïa kaba rem noh shwa,” la ong u Medvedev uba la lah ban thaw rikod ruh da kaba lah ban don ha madan ïalehkai haduh 24 kynta bad 17 minit.
