Shillong, K’Lyngkot 28
Ka Meghalaya ka la ïoh rung sha ka semi-final jong ka lympung ïalehkai Khelo India Games 2024 Men’s Football hadien ba ka la lah ban pynliem noh ïa ka Tamil Nadu da 2-1 kol ha ka jingïalehkai kaba la long ha Chennai ha ka sngi Saitjaiñ.
Kane ka jingjop jong ka Meghalaya kan dei ruh kaba lai sien kynthih kata hadien ba ka la dep ban pynliem noh ïa ka Punjab bad Uttar Pradesh. Da kane ka jingjop ka la pynlong ïa ka Meghalaya hapoh ka jingkhmih jong u Jeffrey Warlarpih kum u Coach bad u Beneslaus Khyriem kum u Manager ba kin ïoh ka jingsdang kaba paka ha ka Group-A.
Haba phai sha ka jingïalehkai, ïa ki kol jong ka Meghalaya la ïoh ban khyrwit da u Deibormame Tongper bad u Mebanlamlynti Masharing. Haduh mynta, u Mebanlamlynti u la ïoh ban khyrwit 3 tylli ki kol, kata 2 tylli ki kol kiba u la ïoh ban thep ha ka jingïakhun pyrshah ïa ka Uttar Pradesh.
Ka jingïakhun ïa ka semi-final kan long ha ka sngi Nyngkong. Kumba ka long mynta, ka Meghalaya ka la lah ban ïalehkai bha mynta ka kynti, kumba ka la lah ban ïalehkai ruh ha u snem 2022 bad 2023 hynrei ha baroh ar sien ka la shah liem noh ha ka semi-final.
Kumta mynta ka kynti, ki rangïalehkai ka Meghalaya kan khmih lynti ba kan ïaleh ban klet noh ïa kito ki snem, hadien ba ka la ïoh rung biang sa shisien sha ka semi-final.
