Aizawl, K’lyngkot:
Ka Mizoram ka la pynpaw ba ka thrang ban don ka jingïakren ha kaba ïadei bad ki bynta u pud u sam bad ka Assam khnang ban lah weng ïa ki jingeh kiba la neh da ki phew snem ha ki bynta khappud hapdeng kine ar tylli ki jylla kiba marjan. Ïa kane ka jingpynbna la rai hadien ba la dep ban pynlong ïa ka jingïalang bad ka kynhun bathymmai ban khmih bniah halor ki jinglong jingman ha ki bynta khappud bad u pud u sam ba la pynïaid da u Myntri ki kam pohïing u K. Sapdanga.
Ha ka jingïalang, ka kynhun ba dei kmih ka la pynpaw ba ka la donkam ka jingïasuk bad ka jingïasngewthuh jingmut bad ban weng noh ïa ki jingïapher jingmut kiba la mih bad ka Assam.
