Shillong, K’Lyngkot 28
Wat la u Raj Biswa u la ïoh ban tied ïa ka spah run hynrei ka Meghalaya ka dang sah shadien bad khlem lah ban tam ïa ka run ba la kamai da ka Mizoram ha ka pali kaba nyngkong jong ka lympung Ranji Trophy Plate Group kaba la long ha Anand, Gujarat ha ka Sngi U Blei.
Ka Meghalaya ha ka pali ba nyng-kong ka la kamai tang 281 run bad duna pat 78 run ïa ka Mizoram kaba la lah ban kamai haduh 359 run ha ka pali kaba nyngkong.
Haba phai sha ka pali kaba ar, ka Mizoram ka la lah ban tied 237 run bad hap 9 wiket bad ban tam ïa ka Meghalaya da 315 run.
U Biswa uba la tied 94 run, ha ka sngi kaba bud u la ïoh ban tied da ka hynriew run ban kot sha ka spah run, ka ban dei ruh kaba lai ha ka jingim ïalehkai ka jong u, kata hadien ba ka Meghalaya ka la bteng ïa ka jingïalehkai na ka 220/5.
Hynrei tang hadien katto katne u para nongtied jong u, u Ram Gurung uba la kamai 35 run na ki 80 tylli ki bol, u la duh noh ïa la ka wiket bad kiba wan ban bteng nadien kim shym la lah ban neh slem, bad ha kaba kut u Raj Biswa u la neh marwei haduh ba kut ban kamai 125 run na ki 283 tylli ki bol.
Ka jinglah ka Mizoram ban kamai run sted ha ka pali ba ar ka la wan lyngba u Guest Player u Agni Chopra uba la lah ban tied biang ïa ka spah run, kata tang na ki 71 tylli ki bol u la tied 101 run, ha ka pali ba nyngkong ruh u la tied 105 run.
Katba u Akash Kumar Choud-hary u la khur 4 wiket ha ka pali kaba ar bad kumjuh ruh 4 wiket ha ka pali kaba nyngkong, kaba la pynlong ïa u haduh mynta ban khur 8 wiket na kane ka jingïalehkai. Kiwei pat ki wiket ka Mizoram la ïoh ban khur da u Lerry Sangma bad u Swarajeet Das kiba la khur mar 2 wiket.
