Berlin, K’lyngkot:
U President ka Ukraine, u Volodymyr Zelensky ha ka Sngi U Blei haba ai jingkren lyngba ka rynsan pathai khubor ARD u la ong ba ka thma hapdeng ka Ukraine bad ka Russia ka lah ban poi sha ka Thma- bah ba Lai lane ka ‘World War Three’ bad ha kajuh ruh ka por u Zelensky u la kyntu ia ki ri ba marjan naduh ka Germany haduh ka United States ba kin dang iai kyrshan ia ka Ukraine katba ka Russia kam pat sangeh ia ka jingleit hiar thma pyrshah ia ka Ukraine.
Kumta ruh u Zelensky u la ong ba lada ka Russia kan sdang ban leit mushlia ia kiwei pat ki ri jong ka NATO nangne shakhmat, kane kan long ka jingsdang jong katei ka Thmabah ba Lai bad ka la dei ka por ia ka pyrthei baroh kawei ba kan shu um hapdeng ka jingiakhun thma kaba jur.
Hynrei, haba la kylli pat halor ka jingsngew jong u ba ka Germany kam don jingthmu ban phah ia ki ‘namding ‘Taurus’ sha Ukraine, u Zelensky u la ong ba u sngewsih kthang namar ba ka Germany kam shym la leh eiei haba iadei bad ka jingshah kurup jong saw tylli ki bynta jong ka Ukraine na kaba sdang jong ka thma.
Hynrei u la ong ba ka jingshah kurup jong katei ka bynta ka Ukraine ha ka Russia naduh u snem 2014, kam long tang ka jingtlot bad jingbym iatrei lang jong ka Germany hynrei ka long namar ka jingtlot ka jingiatrei lang hapdeng ki ri ka thaiñ Sepngi ban leh pyrshah ia ki kam bad ki jingpyni bor jong ka Russia.
Namar kata, u Zelensky u la ong ba donkam ban tehlakam noh ia kane shuwa ba ka Thma-bah ba Lai kan khie bad ka long kaba donkam ia ki ri ka thaiñ Sepngi baroh ba kin ieng tylli lang kawei.
