Brussels, K’lyngkot:
Ha kane ka jingjia la ong ba 2 ngut ki la duh ei noh ia ka jingim hadien ba kawei ka liengsuiñ rit ka la leit hap bakla ha kawei ka kali. Kane ka la jia katba kawei ka liengsuin ka dang pyrshang ban hiar ryngkew kaba la sum stet bha bad hiar artad ha ka surok jong ka thaiñ Mihngi hapoh Belgium ha ka Sngi U Blei.
La ong ba hadien ka jingpulom jong katei ka liengsuiñ ban hiar ha katei ka jaka, ka la kum leit tyngkhuh bad leit rat pynban ia kawei ka kali kaba ïeng ha katei ka surok ha katei ka jaka bad kaba la pynlong ia katei ka liengsuiñ bad katei ka kali ba kin kem ding.
Kumta, la ong ba kitei 2 ngut kiba shong ha katei ka liengsuiñ rit ki la mynsaw jur bad kaba la pynlong ia ki ban duh noh syndon ia ka jingim na katei ka jingjia.
Katkum ki jingtip ba la iohlum, la ong ba u nongñiah ‘Pilot’ jong katei ka liengsuiñ u dei u nong Germany hynrei ka jingtohkit ka dang iaid shakhmat ban lap pat sa ia utei uba shong ha katei ka liengsuiñ bad uba khlad lang ha katei ka jingjia.
Ha kaba iadei bad kane, la ong ba u nongñiah jong katei ka kali kaba ïeng harud surok pat, u dang mih shabar ban dih duma bad kumta katei ka long ka sngi ba u dang lait thaw na katei ka jingjia ba shyrkhei.
