Istanbul, K’lyngkot:
Katkum ki khubor la iathuh ba 2 ngut ki runar ki la synreit kuli naphang ha kawei ka iingmane jong ki Nong Italy kaba don hapoh Istanbul katba ki dang ia pynlong jingiaseng ha katei ka Sngi U Blei, ha kaba uwei u la khlad hashen hapdeng katei ka jingjia.
Kane ka la jia ha ka por kumba 11:40 jong ka por shiteng sngi ha katei ka iingmane ha Santa Maria kaba don hapoh jong ka distrik Sariyer jong ka Istanbul bad ia kane la don kti da 2 ngut ki runar kiba la kah dur ialade.
Kumta, ka tnat pulit jong katei ka ri ka dang bud dien bad wad bniah halor katei ka jingjia bad ia ka daw jong katei ka jingleit synreit kuli kitei ki runar ha katei ka jaka.
Katkum ki dur ba la saphriang paidbah, la iohi ia ki kynhun pulit bad ki kali kit nongpang habar jong katei ka iingmane kiba dang kit ia kiba mynsaw bad ba khlad na katei ka jaka ha katei ka sngi.
Ki bor pyniaid ka Istanbul ki la pynrem jur halor katei ka jingjia bad ki la kular ba kin nym pyllait ia kum kitei ki nongleh pynkheiñ aiñ bad ki runar kiba ju wanrah ia ki kam thombor ban pynthud ia ka shongsuk- shongsaiñ hapoh ka ri.
Namar ia ka daw jong katei ka jingjia ym pat lah ban tip satia bad kumta ki bor pyniaid kim pat shym la ai jingpynshai eiei ruh halor katei ka jingjia hynrei la shu iathuh ba ki don 2 ngut ki runar kiba la kah dur ialade kiba leit ban thombor ia kitei ki riewngeit hapoh katei ka iingmane ha katei ka sngi.
Ha u Nohprah jong une u snem ba la lah, ki bor pahara ka Turkey ki la ioh bat kumba 32 ngut ki briew kiba suba don kti bad ka kynhun lehnoh Islamic State (IS) bad kiba thmu ban leit thombor ia ki iingmane bad ki jaka mane jong ki jaitbynriew bapher bapher kiba don ha kylleng jong katei ka ri.
Namar la ong ba ki lehnoh IS ki ju pynpaw bha ia ki kam thombor hapoh ka ri Turkey, kynthup ia ka jingjia thombor kaba la jia hapoh ka jaka leh kmen ‘Nigthclub’ kaba don hapoh Istanbul bad kaba la jia ha u snem 2017 ha kaba 39 ngut ki la khlad na katei ka jingjia ha katei ka por.
