Shillong, K’Lyngkot 29
Ka Mizoram ka la pynliem noh ïa ka Meghalaya da 191 run ha ka sngi kaba saw bad kaba khatduh jong ka Ranji Trophy (plate group) kaba long ha ka Lah Sngi U Blei ha Anand, Gujarat.
Haba wan beh ïa ka thong kaba 316 na ka bynta ban khur ïa ka jingjop, ki nongtied ka Meghalaya ki la shah pynkhyllem lut baroh wiket na ka bynta ban kamai tang 124. Ka Mizoram kaba la lah ban tam ha ka inning kaba ar da kaba kamai 237 run bad shah pynhap 9 wiket, ka la donkam 58.4 over na ka bynta ban khanglad ïa ka liang pyrshah.
Kum ban phai dieng biang, ka Mizoram ka la lah ban kamai 359 run bad shah pynkhyllem baroh ki nongtied ha ka inning kaba nyngkong, hynrei ka Meghalaya kaba la wan beh ïa ka thong ka la kamai 281 run bad shah pynhap 10 wiket.
Ha kane ka kynti kaba mynta u Raj Biswa um shym la lah ban ïalehkai bha, hynrei kiwei pat ki paralok ba ïalehkai lang ki la lah ban pynhap wiket ïa ki lai ngut ki nongtied ka Mizoram kata ïa u KC Cariappa (4/48), Thanku-ma (3/34) bad u Mohit Jangra (2/36). U Cariappa bad u Mohit ki dei ki rangïalehkai (guest player) bad kiba la lah ban ïalehkai bha na ka bynta ban pynlong ïa ka Mizoram ban khur ïa ka jingjop.
Ha kane ka aïom ïalehkai, ka Meghalaya Cricket Association ka la rai ban pynïalehkai tang da kiw rangïalehkai kiba napoh ka Jylla na ka bynta ka Ranji Trophy.
U Arien Bonchang Sangma u la lah ban ïalehkai bha bad u la shah pynkhyllem noh hadien ki 149 bol, kaba la ïaryngkat bad ki 24.5 over. Ka jinglah ban tied 26 ki la long ki jinglah ban kamai run ha ka inning kaba ar. kiwei pat ki nongtied kiba la lah ban tied 20 ruh ki long Dippu Ch Sangma (24 run na ki 21 bol) bad u Jaskirat Singh Sachdeva (21 run na ki 41 bol).
Kumba ka long mynta ka Meghalaya ka la khur jingjop ar sien bad shah re mar sien bad kan hap ban ïalehkai bha ha ka jingïakhun kaba khatduh jong kane ka group pyrshah ïa ka Sikkim ha Rangpo ka ban sdang naduh 2 tarik u Rym-phang. Ka Sikkim ka dei ka kynhun kaba la lah ban khur jingjop ar sien bad shah rem mar sien.
